Sekretaria Estadu Formasaun Professional no Emprego (SEFOPE) hakarak atu liga joven ba instituisaun no Ministerio no Organizasaun Naun Governamental (ONG) sira liu hosi Program Estajio atu ajuda kapasita joventude iha rai laran.
“Liga ba instituisaun, Ministerio, NGO sira seluk atu aumenta sira nia konhesemento. Governo iha responsablidade politika ida para suporta joven sira ba subsidio transporte ninian para fasilita sira tuir formasaun,” hateten Xefe Departamentu Centro Formasaun Baucau (CFB) Belarmino da Cruz, foin lalais, iha Baucau.
Tuir Xefe da Cruz sira sei suporta joven sira halao estajio professional liu hosi programa naran Programa Formasaun Servisu Fatin bele ba fulan neen ka fulan hat depende ba Ministerio ka NGO ne’ebe fo oportunidade.
Iha Programa Formasaun Servisu Fatin ne’e kada fulan ida SEFOPE aloka ba organizasaun ne’ebe simu estajiariu $80 per ema ida kada fulan ba fulan tolu nos mos fasilita $300 ba transporte durante estajio.
Iha 2012 Programa ne’e sei kontinua nafatin.
Iha parte seluk estagiante Tiago da Silva kontente ho nia partisipasaun iha programa estajio hosi SEFOPE.
“Hau sente katak programa ne’ebe Governo halo ne’e diak tamba fo oportunidade mai ami, tamba estagio ida ne’e hanesan oportunidade ne’ebe atu nune’e bele fo kapasita liu tan ba Jovens sira oinsa atu bele halo servisu iha fatin ruma,” hateten nia.
Nia mos sente katak buat ne’ebe estajiantes sira aprende bele aplika kedas iha sira nia moris nudar professional.
Estajante da Silva husu mos ba SEFOPE se bele prolonga tan programa nia tempo liu liu ba sira ne’ebe seidauk konsegues hetan servisu durante tempo estajio atu bele nafatin kontinua fasilita sira dezenvolve sira nia kapasidade.
