Atu aumenta kapasidade no esperiensia servisu iha area industria, governu liu husi Sekretariu EStadu Formasaun Profesional e Empregu (SEFOPE) sei haruka tan trabalhadores Timor Oan naiin 10 ba Australia iha Marsu tinan ne’e.
Tuir Diretor Nasional Empregu Paulo Alves katak SEFOPE asina ona nota de intendementu ho governu Australia iha Dezembru tinan kotuk.
“Iha industria rua iha rai ida naran Broome iha Australia ne’ebe aprova ona ita nia trabalhador hamutuk na’in 30, agora dadaun ami halo hela rekolhamentu ba Curriculum Vitae no iha dia 16 ami sei halo intervista no seleksaun final, se se mak liu sei tama iha exame mediku pasa iha exame mediku sira sei tuir pre-elementary training (kursus ingles ) iha Lely, supporta husi AusAid maibe na’in 10 mak sei aranka uluk iha dia 01 fulan Marsu tinan 2012 iha area Hospitalidade nian, dehan director Emprego, Paulo Alves, (12/01) iha Kaikoli, Dili.
Nia hatutan, trabalhadores sira ne’e sei servsiu iha area hospitalidade nian ho durasaun fulan neen depois sira sei fila mai, maibe karik durante iha ne’eba sira hatudu komportamentu servisu diak no kompania sei presiza sira nia energia sir abele fila fali atu ba kontinua servisu.
Diretor ne’e hatutan, sei la para ho na’in 10 maibe sei kontinua ba sira ne’ebe hakarak servisu iha Australia to’o numeru ne’ebe kompania husu.
Iha lidun seluk Presidente Konfederasaun Sindikatu Timor-Leste (KSTL), Jose da Conceição da Costa hateten programa ne’e kapaz nune’e bele redus numeru dezempregu iha railaran.
“Nudar presidente KSTL husu ba kolega sindikatu sira iha Australia bele organiza trabalhadores Timoroan sira ne’ebe atu ba hala’o sira nia servisu iha Australia tama iha grupu sindikatu no hare sira nia kondisaun servisu labele iha diskriminasaun no labele iha explorasaun ba trabalhadores sira nia direitu tuir lei Australia no kontratu ne’ebe governu TL no Australia iha,” nia sujere.
Nia parte esperansa katak trabalhadores sira ne’e sei la hasouru problema ruma iha Broome –Australia.
