Atu garante efetividade servisu ne’ebe ho responsabilidade iha Fundasaun Alola (FA) nia laran, fundasaun oferese fatin hodi ‘Tau Matan ba Labarik (CCC)’ ba nia funsiunariu feto sira ho gratuita durante oras servisu nian.
“Centru ne’e harii iha tinan 2007 ho objetivu atu ajuda inan-aman sira tau matan ba labarik no bebe sira maibe ami la foti labarik husi liur, ami so tau matan deit ba funsionario fundasaun alola nia oan tanba centru ne’e loke ba staff nia oan deit, ho idade fulan tolu to’o
tinan lima, nune’e sira labele halai ba fali uma hodi fo susu ba sira nia oan (bebe) no atu inan-aman sira hala’o servisu ho konsentrasaun ne’ebe diak,” dehan Coordenadora Child Care Center, Rosita dos Santos, semana kotuk (09/01), iha Mascarenhas, Dili.
Nia dehan, atividade ne’ebe labarik sira halo durante iha fatin ne’e mak hanesan halimar,kanta,pinta no alfetismu ho lingua Portugues,Ingles no Tetun e total labarik desde harii to’o agora hamutuk 100.
Kona ba bebe oan sira ne’ebe fulan tolu mai ho nia baby sitter maibe sira ne’ebe tinan ida ba leten la presiza. Labarik sira tama iha centru ho oras ne’ebe hanesan ho inan-aman sira nia oras servisu husi tuku 08:00 dader to’o tuku 12:00 inan-aman sira foti sira ba han meudia depois tuku 2:00 tama fali to’o tuku 05:00 lokraik mak foin sai ba uma.
Entretantu Profesora Domingas Varela,hateten sai professora ba labarik ho idade fulan tolu to’o tinan lima ne’e hanesan esperiensia importante ida ne’ebe nia hetan.
“Hau pesoal sente kontente atu anima labarik sira tanba ne’e hanesan esperensia inportante ida ba hau maske difisil tanba labarik ho idade tinan ida to’o tinan lima ne’ebe nakar no tanis (cengeng) maibe hau nudar profesora buka meus atu anima sira hamaus, nune’e labarik bele sente seguru bainhira halimar ho hau,” Professora Varela dehan.
Nia hatutan katak durante nia sai professora ba labarik sira iha centru hare labarik ne’e labarik sira dia dezenvolvimentu kapasidade kapas tebes tanba sira (labarik) brani atu kanta, dansa no komunika ho ema nune’e mos kona ba lingua.
