Membru Parlamentu Nasional (PN) Deputadu Francisco Jeronimo ne’ebe mos nudar Vise Prezidente Komisaun F Parlamentar husu ba Ministeriu Edukasaun (ME) tenke fo atensaun maka’as ba edukasaun tanba nasaun presiza ema matenek barak.
“Hau hanoin ba 2012 tenki fo atensaun maka’as ba educasaun se kuando la fo prioridade ba area educasaun susar tebes. Ema matenek tenki barak atu kontribui dezenvolve rai ne’e sai diak,” sujere Deputado Jeronimo, semana kotuk (10/01) iha Uma Fukun Parlamentu Nacional, Dili.
Deputado Jeronimo hateten nasaun ida dezenvolvidu bainhira iha ema matenek barak tanba ne’e edukasaun sai nafatin prioridade ba nasaun ida ne’e.
Entertantu Deputadu Estanislao Aleixo da Silva, tuir nia hare katak iha dezigualidade bo’ot entre escola privadus no publiku tanba laiha programa konsistente ba programa formasaun profesores nian hodi hasae sira nia nivel ensino.
“Oras ne’e ensino siensia, matematikas, linguas sei iha defisiensia bo’ot nafatin iha Timor-Leste,” nia observa.
Iha fatiin hanesan Xefe Bankada Partido Demokratiko (PD) Adriano do Nascimento hateten iha ukun aan ida nia laran sempre iha failhansu tanba ne’e sujere ba Ministerio Educasaun atu hare didiak ba kestaun ne’e.
“Hau hanoin ida ne’e mak ba ukun aan ida nian, buat balun la’o diak balun la diak ida ne’e oinsa mak nasaun ida bele sai dezenvolvidu tanba nasaun ida atu dezenvolve presiza ema matenek barak,” nia dehan.
Entertantu bainihra TDW koko konfirma asuntu ne’e ba iha Ministerio Educasaun maibe lakonsege tanba Ministru Dr. Joao Cancio Freitas halo hela enkontru ho Diretores sira husi 13 Distritu.
