Tuir Lei Baze Educasaun eskolaridade ba Ensino Baziku kompletu mak tinan sia nune katak eskolas iha area ka rejiaun ida tenki halo agrupamentu no labele halai keta ketak atu nune iha sentru ida deit ba Ensinu Baziku iha area ida. Ida ne’e mos atu garante kontinuidade ba estudantes sira atu bele estuda Ensino Baziku iha area ida deit no bele hetan akompanhamentu adekuadu hosi professores no eskola ba tempu naruk.
“Se nia [estudante] muda ninia hela fatin nia bele escola fali iha fatin seluk, se nia la muda nia tenki escola nafatin iha escola centru ne’ebe iha,” hateten Vise Prezidente Komisaun F Parlamentar, Francisco Jeronimo, semana kotuk (10 /01) iha Uma Fukun Parlamentu Nasional, Dili.
Nia parte hato’o kestaun ne’e relasiona ho eskola Pre-sekundaria balun la simu estudante ne’ebe akaba eskola bazika husi fatin ida ba fali fatin seluk.
“Se iha fatin ida iha escola bazika ida e depois nia filial iha rua tolu mak iha ne’eba, nia tenki ba escola duni iha ne ‘eba remata segundo siklu ba fali terceiru siklu iha sentral.
Kona ba profesores, nia dehan professores la iiha problema atu hanorin iha fatin ne’ebe deit tanba sira funsiunariu publiku.
Ba alunus sira tenke agrupa iha eskola ida, labele ba fali sentral seluk.
Iha parte seluk estudante Cecilia da Silva, sente triste regulamentu husi Ministeriu Edukasaun ne’ebe bandu sira atu ba eskola iha fatin seluk.
“Ami atu ba escola iha escola sira seluk lolos fo livre ba ami atu ba escola sira ne’ebe ami hakarak atu ba escola,” nia dehan.
Iha parte seluk Bemvinda Da Silva nudar inan komunidade hateten katak nia konkorda ho desizaun Ministeriu Edukasaun.
“Hau konkorda buat ne’ebe Ministru Educasaun fo sai ne’e diak tamba dala barak labarik sira ne’ebe hela do’ok sira tenki ba tarde escola no la tuir material ne’ebe mak professores sira hanorin ba Sira,” hateten komunidade ne’e .
Inana da Silva hateten mos katak laos nia oan sira tama escola tarde deit maibe dala ruma sira mos tenki sa’e mikrolet no gasta osan barak atu to’o iha escola.
“Diak liu tan sira escola besik deit iha escola ne’ebe sira hodi remata iha ensino.”
