Planu estratejia Sekretario Estadu Formasaun Professional (SEFOPE) liu husi Diresaun Nasional Formasaun Professional (DNFP) ba 2012 halo kontinuasaun ba planu ne’ebe implementa ona iha tinan kotuk hanesan promove programa On-The-Job Training (Esperensia Servisu Fatin) tanba programa ne’e hatudu progresu ne’ebe positive tebes katak joven barak hetan servisu liu husi programa ne’e.
“Ami em prinsipiu iha diresaun formasaun professional ami pronto atu dezenvolve programa ne’ebe iha agora dadaun ami nia tim halo hela avaliasaun ba proposta balun ne’ebe atu submete liu –liu proposta esperensia servisu tanba durante ne’e joven sira ne’ebe
esperensia durante tinan hira ne’e hatudu duni progresu ne’ebe diak tanba ne’e programa ne’e presiza promove nafatin tanba teoria deit la to’o ne’e mak ami nia focus ba tinan ida ne’e promove programa job training,” dehan Diretor Nasional Formasaun Professional, Albano Salem, semana kotuk (12/01) iha Kaikoli Dili.
Tuir Salem, orsamentu ba dezenvolvimentu fundus capital umanu iha U$ 1milion e tal ne’ebe aloka ba Sekretario Estado Formasaun Professional iha area DNFP atu fo apoiu ba Centrus Formasaun ne’ebe regista ona katak prense ona patraun registrasaun hamutuk 16 tuir avaliasaun SEFOPE atu promove kapasitasaun joventude feto ka mane atu aprende esperensia servisu iha rai laran no nafatin fo apoiu ba sira ne’ebe seidauk regista ka seidauk prense criteria registrasaun ne’ebe hanaran centru komunidade.
Nia informa katak iha tinan 2011 SEFOPE konsege treinu ema joventude feto ka mane hamutuk rihun hitu resin iha area oioin hanesan konstrusaun, outomotif, agrikultura, administrasaun, IT, soldadura no seluk tan.
Iha parte seluk, Xisto Gonçalves, Kordenador Programa Direitus Umanus no Direitus Labarik iha Organizasaun Non Governmental (NGO) Forum Tau Matan hateten planu no estratejia ne’ebe DNFP implementa ne’e planu ne’ebe diak tebes tanba bele kontribui ba dezenvolvimentu rekursu umanu iha rai laran.
“Hau hanoin planu ne’ebe diak tebes maibe importante mak skill formasaun ne’e tenke nakloke ba iha distritus labele konsentra deit iha Dili tanba tuir hau nia observasaun katak centru formasaun ba joventude sira barak mak konsentra iha Dili iha distritu ita lahare entau joventude barak konsidera katak Dili fatin ne’ebe fasil atu hetan esperiensia iha area formasaun ruma, hau sujere ba SEFOPE atu bele iha tinan ida ne’e bele loke to’o iha distritu para ema hotu iha distritu hetan oportunidade atu tuir,” nia sujere.
