Editorial ida ne’e nafatin kona ba problema ahi mate-lakan maske ema balun hetan ona ahi lakan estavel maibe ita nudar sosiedade la bele kontente wainhira ema balun deit mak hetan diak wainhira ema seluk (liu liu iha distritus) nafatin hakilar kona ba problema ahi mate-lakan.
Komunidade sira sente kontente no governu halo selebrasaun bo’ot bainhira rona Presidente Ramos Horta fo sai katak dia 28 Novembru 2011 katak agora ba oin ahi sei lakan normal durante oras 24 nia laran.
Promesa ne’e, fou-foun halo tuir duni maibe foin mak tama tinan foun Janeiru 2012, ahi iha bairo balun komesa mate fali. Hanesan akontese iha bairo Pantai Kelapa iha Sabado (14/01) ahi mate kuaze ke oras tolu nia laran iha parte dader, e lakan fali no mate fali iha lokraik to’o kalan mak lakan fali.
Ida ne’e hatudu katak promesa ne’ebe governu halo ba povu liu-liu iha Capital Dili hanesan simbolu deit katak ‘secara politik’ bele maibe ‘secara teknik seidauk bele’.
Iha Dili deit se lakan mate sa’tan iha distritu, pior lliu tan.
Tanba ne’e kuandu governu seidauk iha kapasidade labele promesa uluk ba povu.
Kuandu ita kompara tempu ukun aan no tempu okupasaun, iha tempu okupasaun Indonezia ahi lakan durante oras 24 nia laran, maibe depois ita ukun aan husi primeiruu governu to’o kuartu governu, sempre iha failansu ba eletrisidade. Promesa hela ba promesa mais nunka sai realidade. Karik tanba foin ukun aan maibe ida ne’e la’os razaun ne’ebe ema hotu atu rona.
Se nune’e problema fundamentais ba eletrisidade lakan-mate ne’e saida, agora uza fiu foun e ahi kontinua lakan-mate. Karik fiu sira monta foun ne’e mak laiha kualidade, tanba ne’e bainhira udan bo’ot, sirkuita entaun ahi mate.
Iha notisias ida TDW fo sai semana kotuk, tuir reprezentante EDTL ida hateten katak fiu eletrisidade sensitivu los katak ai-tahan monu iha nia leten mos ahi mate kedas.
Antes ne’e governu halo estudus viabilidade kona ba fiu sira ne’e, katak iha duni kualidade ka la’e, tanba agora iha bairo Praia dos Coqueiros, karik mos iha bairo seluk ahi mate loron-kalan deit, liu-liu iha tempu udan.
Ami nia sujestaun, governu labele koalia deit maibe tenke implementa tanba povu hakarak realidade la’os lia fuan, sa’tan agora besik tan eleisaun bo’ot rua, Prezidensial no Parlamentar povu presiza ahi.
Molok kampanha ba Eleisaun hahu no politiku nain sira halo tan promessas ami fo hanoin deit ba bo’ot sira katak diak liu promete bazeia ba realidade no saida mak bele halo duni la os deit saida mak ema hakarak rona atu bele hetan tan votos.
