Hare ba situasaun real iha Timor-leste katak sei menus pesoal saude sira iha Sentru Saude (CS) sira durante ne’e, tanba ne’e planu Ministeriu Saude (MS) ba oin sei tau mediku Timor oan iha CS sira hotu iha Timor laran tomak.
“Oinsa ita atu resolve ba oin hau hanoin ita mos forma ona medikus Timor oan barak kuaze hitu nulu ona entau ba futuru ita hanoin atu tau deit ona medikus Timor oan iha centru saúde sub-distritus hotu tanba Timor oan hatene dezaraska katak oinsa buka bee iha komunidade atu bele hela nafatin hodi fo atendimentu ba
komunidade duke ita tau mediku estrangeiru entau sira latoman ho sistema moris Timor oan nian iha area remota hanesan lalin bee no haris iha mota,” dehan Diretor Jeral MS, Agapito da Silva Soares, semana kotuk (11/01) iha Kaikoli Dili.
Nia dehan, Timor-lLeste husu mediku estranjeiru sira atu fo asistensia ba povu sira ho akordu ida katak tenke kria kondisaun ne’ebe diak hanesan hela fatin kompletu ho bee moos no ahi maibe relaidade bee moos laiha.
“Ita labele obriga ema se ita rasik la fo bee moos no eletrisidade. Hanesan Timor oan ita hakarak iha bee no fasilidade seluk para mediku estranjeiru sira bele konsentra servisu fo asistensia ba komunidade maibe situasaun Timor –Leste mak hanesan ne’e husu mediku estranjeiru sira tenke kompriende, sei hadia maibe presiza tempu ne’ebe naruk,” nia katak.
Iha parte seluk Vise Prezidente Komisaun F Parlamentar, Deputadu Francisco Jeronimo hateten katak nesesidade bazika hanesan bee mos ne’e inportante tebes ba mediku no infermeiru sira atu fo asistensia ba komunidade iha centru saúde sira hotu, liu-liu iha Centru Saúde Sub-distritu Uatocarbau ne’ebe laiha bee moos.
“Hau hatene Centru Saúde Sub-distritu Uatocarbau tanba hau mos ba vizita ona iha ne’eba bee mos laiha duni, depois fila husi ne’eba hau hatete ona kestaun ne’e ba ministerio saúde atu kria kondisoen para centru saúde bele asesu ba bee mos se bee mos laiha oinsa ita bele hanorin komunidade atu moris iha ambiente ne’ebe mos katak tenke fase liman hafoin han maibe centru saude deit bee laiha ne’e kazu ne’ebe prekupante tebes,” dehan Deputadu, Jeronimo.
Nia hatutan katak centru saúde ne’e presiza tebes bee ne’eduni ministerio saúde tenke halo kanalizasaun ba bee (fura bee).
Hatan ba kestaun ne’e director geral, Agapito informa katak kestaun ne’e laos falta kanalizasaun maibe tanba bee mak laiha duni iha komunidade nia let ne’e ministerio saúde labele halo buat ida se bee iha mak ministerio lahalo kanalizasaun ne’e kestaun seluk.
