Atu hatene tuir universidade privada sira nia sistema aprendijazen iha kampus, governu liu husi Ministeriu Edukasaun (ME) kontinua halo kontrola tuir kriteriu ne’ebe implementa husi edukasaun ba eskola sira inklui universidade privada sira.
“Universidade Dili la’o ho povu, la’o ho fundasaun, la’o ho veteranus, la’o ho governu, governu fo atensaun tanba nune maka hau iha fiar garante atu bele salva universidade,” dehan Reitor Universidade Dili (UNDIL), Antonio Cardoso, semana kotuk (10/01) iha Parlamentu Nasional, Dili.
Nia mos hatutan katak, relasaun ne’ebe mak UNDIL halo mak tenki halo ho governu se’e deit maka kaer ukun ida ne’e, partidu se’e deit maka governu, “ita ne’ebe maka hakarak loke institusaun, organizasaun saida deit iha Timor mak ita iha parseiru diak maka governu e UNDIL halo duni parseiru ho Governu. Nomos Governu liu husi Ministeriu educasaun halo duni kontrolasaun ba iha Universidade Privada sira liu-liu iha universidade UNDIL,” nia dehan.
Iha fatin hanesan Deputadu Inacio Moreira, FRETILIN, hateten objetivu ho edukasaun mak bainhira estudante ida remata eskola tenki iha kualidade, “ne’e maka importante liu.”
Tanba ne’e tuir nia, governu tenki kontrola ba universidade privada nomos universidade sira seluk atu nune’e sistema educasaun ne’e bele implementa hanesan mos ho universidade sira seluk.
Nia haktuir tan katak iha parte seluk controla atu nune bele hatene mos universidade ne’e iha valor duni ba iha estudante sira ka lae.
“Para atu nune’e estudante sira nebe gradua husi universidade sira ne’e bele iha kualidade duni, nomos kualidade diak.”
