The Organization Of Action Study Iinter Society (OASIS) Organizasaun Non Govermentais (NGO) ne’ebe servisu ho voluntario ba joventude sira, labarik sira, inklui mos aleijadu, hodi fo formasaun ba sira hodi hasae sira nia kapasidade iha area educasaun, desportu no mos informatika.
“Organizasaun sai hanesan fatin no centru ba joventude sira, prinsipio oinsa bele hare joventude sira bele hakbesik mai iha centru ne’e nudar centru ba sira inklui labarik no aleijadu sira. Maibe prosesu servisu liu husi ami nia inisiativa rasik servisu voluntario,” hateten Diretor NGO OASIS, Distritu Baucau, Flaviano Pereira Jeronimo, iha nia knar fatin Uatu Lete Villa Nova Baucau, foin lalais ne’e.
Tuir Diretor Jeronimo katak labarik, joventude no aleijadu sira tama pakote ida ne’ebe la’o hanesan no laiha diskriminasaun. Sira aprende lingua Ingles, Japaun no mos aprende komputadores, sistema rua Ubuntu ho Windows Xp, no mos ba aktividades desportiva ba joventude no labarik sira.
Ba aleijadu hare liu ba esperensia ne’ebe iha 2008 OASIS hahu halo mobilizasaun servisu hamutuk ho organizasaun sira balun aleijadu nian no sira ba tuir Para-Olimpicu no sira konsege lori medalha osan mean ida, prata ida no bronze tolu.
NGO OASIS harii iha 2003 iha Dili hahu servisu voluntario maibe iha krizi 2006 fasilidade sira rahun maibe hahu hikas sira nia servisu iha 2007 no muda ba Baucau servisu to’o agora, ho staf kompletu nain 14 kompostu husi feto 6 no mane 8.
“Ami nia mehi ba 2012 ami sei implementa programa hortikultura, treinamentu joventude iha area listrik, elektronika, programa artes nian, enjinaria (perbengkelan) projetu mediasaun nian. Ho kbi’it ho esforsu a’an maske ho montante ki’ik maibe ami koko servisu hodi servi ba ita nia labarik, joventude, no mos aleijadus sira,” Diretor Jeronimo katak.
Entertantu aleijadu Nilton Martins husu ba OASIS atu fo sai avizu ba sira bainhira iha formasaun ruma.
“Ami sira ne’ebe aleijadu iha kapasidade atu escola maibe inan-aman sira la iha kapasidade no forsa atu educa ami, ka atu bele ba tuir formasaun iha fatin ne’eba no bele aprende saida mak ami hakarak ba ami nia futuro aban bain rua nian,” joventude Martins husu.
