Atu hametin unidade entre estudante no joventude hosi Aldeia Watubala no Aldeia Waimanuboe, Suku Wailili, Subdistritu Baucau Vila, Distritu Baucau, organiza malu hodi halibur joga jogo tebe bola-amizade ba mane no volleybal ba feto durante festas Natal no Tinan Foun foin lalais ho objetivu bele kria dame no pas no hametin unidade entre aldeia rua ne’e.
“Objetivu ne’ebe mak ami halo iha programa halo ba selebrasaun Natal no Tinan Foun ne’e oinsa atu bele kria unidade entre estudante no juventude no mos ba inan-aman sira,” hateten Kordenador eventu, Sancho Lekimata, iha Aldeia Waimanuboe, semana kotuk (01/01).
Kordenador Lekimata hateten tan katak iha tempu bai-bain iha Aldeia rua ne’e problema sempre mosu tanba ne’e mak liu hosi inisiativa husi estudante no juventude hakarak atu halibur hamutuk ho inan-aman sira oinsa bele halo refleksaun ba sira nia hahalok durante tinan 2011 nia laran.
“Hanoin ida ne’e ita bele sente, ita bele halo refleksaun ida, ita bele haluha buat balun ne’ebe mak durante ne’e ita halo diak, I buat balun ne’ebe ita halo at,” hateten Kordenador Lekimata.
Eventu ne’e realiza suporta husi inan-aman, juventude no estudante sira nian liu hosi kobransa kikoan ida hodi loke eventu ne’e.
“Ami la husu Governu maibe ami husu deit ba inan-aman no funsionariu sira balun ne’ebe mak husi Aldeia Waimanuboe no Watubala nia oan deit.”
Kordenador Lekimata dehan mos katka molok sira realiza eventu ne’e sira enkontru ho juventude sira, ho inan-aman, no mos ho autoridade lokal sira.Entertantu Xefi Aldea Waimanuboe, Alfredo Freitas, senti kontenti tebes ba eventu ne’ebe mak juventude no estudante sira iha Aldea Watubala no Waimanuboe nia oan sira halo no katak inisiativa ne’e konsiderasaun diak hosi joventude sira fo ba malu hodi realiza eventu ne’e hodi kria pas, dame no estabilidade iha aldea rua ne’e nia laran.
“Ita fo obrigado barak ba estudante no juventude sira tanba programa ne’e komesa husi hahu to’o remata ona lao ho diak no susesu,” hateten Xefi Freitas.
Iha fatin hanesan, Cornelio Antonio Xavier nudar Lia-nain ba eventu ne’e, husu ba juventude Watubala no Waimanuboe nia oan sira tenki respeita malu.
“Hau nia observasaun ba Jogo Amizade ne’ebe kampu rua ne’e kria hau senti kontenti tanba ami nudar inan-aman durante tinan sanulu resin ukun a’an tan deit ami hamlaha mak lao namkari ona, I ami nia sentimentu mos la iha ona, I konsiensia moral mos la iha ona tan ne’e mak ami husu obrigadu barak ba imi joventu no estudante kampu rua ne’e nia oan,” hateten Lia-nain Xavier.
Nia hatutan tan katak, liu husi juventude no estudante inan-aman sira bele konsentra iha fatin ida hodi bele fo hanoin diak no esperiensia ne’ebe diak ba malu.
“Iha eventu ida ne’e joventude no estudante Watubala no Waimanuboe nia oan esforsu an ona tanba tempu ona atu hamutuk.”
