Aldeia Waimanuboe, Subdistritu Baucau Vila, Distritu Baucau, nia uma kain hamutuk sanulu resin la hetan energia eletrika to’o oras ne’e tanba falta fiu metan eletrisidade la to’o nune la konsege dada ahi ba sira nia uma.
“Ahi tama uluk kedas iha ami nia Aldea laran maibe tan deit fiu metan atu dada tutan mak la iha tanba ne’e mak hau nia komunidade sira hamutuk uma kain sanulu resin la asesu eletrisidade ba sira nia uma,” hateten Xefi Aldea Waimanuboe, Alfredo Freitas, semana kotuk (1/01).
Xefi Freitas apela ba iha Governu atu dada fiu metan ba tian ne’ebe hamrik ona atu nune’e komunidade uma kain sanulu resin ne’e bele asesu enerjia eletrika.
“Hau nia populasaun sira uma besik kedas iha tian eletrisidade nian maibe tanba fiu metan husi tian bot ninian mak la iha mak lakonsege sira dada ba sira nia uma,” hatutan Xefi Freitas.
Entertantu membru komunidade Waimanuboe, Joao Sarmento, hateten katak ate agora nia sunu deit lampu tanba sira hakarak atu dada eletrisidade maibe fiu metan iha tian ninian mak la iha.
“Iha ami nia aldea eletrisidade tama desde uluk kedas ona maibe ami komunidade iha Aldea Waimanuboe parte balun deit mak hetan balun la hetan barak,” dehan Komunidade Sarmento.
Nia husu ba Governu liu-liu Ministeriu kompetente atu dada fiu metan ne’e atu nune’e sira mos liga tutan ba sira nia uma.
“Tanba ami komunidade iha aldeia Waimaboe liu-liu ami hela iha rai Waikama ne’e komunidade uma kain lubuk ida mak la konsege dada ahi ba ami nia uma.”
