Membru Parlamentu Nasional, Deputado Adriano do Nascimento, PD, preokupa tebes konaba salariu trabalhador Timoroan sira nebe mak servisu iha loja loron ida hetan $3 deit, no mos wainhira tempu feriadu sira kontinua servisu.
“Hau hanoin husu ba Deputadu sira liu-liu komisaun nebe elabora hela lei ne’e, atu hare didiak,” hateten Deputadu do Nascimentu iha Plenaria Parlamentu Nasional, foin lalais iha Dili.
Deputado do Nascimento hateten tan katak tabela $3 ne’e laos tempu ona, se wainhira Governu la tau atensaun iha 2011 nia laran satan ba iha tinan 2012. “Atu hare ida ne’e, hau hanoin presiza atu hatama lei ne’e bele ka lae ou ita halo lei ida konaba tabela salariu estandar ninian.”
Nia informa tan iha plenaria katak standar salariu ba trabalhadores loja iha rai laran mak $3 ba loron ida servisu. “Ne’ebe horseik balun hasoru hau, sira dehan ami Natal mos la ferias, servisu to’o kalan, maibe ami nia salariu mak ne’e loron ida $3.”
Iha fatin hanesan Deputadu Inacio Moreira, FRETILIN, konsidera katak servisu husi Sekretaria Estadu Formasaun Professional e Emprego (SEFOPE) nian mak falha tanba halo treinamentu bara-barak maibe nia rezultadu la iha.
“Treinamentu barak mak halo maibe Timoroan sira ne’ebe hetan treinu ne’e ba servisu iha ne’ebe, halo saida, iha kualifikasaun ka lae,” hateten Deputado Moreira.
Tuir Deputado ne’e katak maske Estadu aloka orsamentu bara-barak hodi loke treinamentu maibe nia rezultadu la iha.
Alende ida ne’e Deputadu Pedro da Costa, CNRT hateten katak salariu minimu akontese ba trabalhador iha rai laran iha loja no kompania hanesan deit tanba kampu trabalhu menus.
“Tanba ita nia povu la kohi ona servisu iha to’os no natar iha foho. Neba sira hotu-hotu mai konsentra iha Dili, depois merkadu trabalhu oituan, ita prefere barak liu ema fo deit dolar tolu ba ita, ita ba servisu ona,” dehan Deputado da Costa.
Deputado ne’e sublina mos katak, presiza regulamentu ida atu bele inpoin salariu razoavel ba trabalhadores hotu iha Timor-Leste maibe ita hotu-hotu tenki tau atensaun no partisipasaun duni wainhira ida ne’e akontese.
“Maibe merkadu trabalhu menus hanesan ne’e, ita obriga ema hotu-hotu halo tuir ita nia vontade hau sente susar karik tanba ita iha merkadu livre.”
Entertantu Deputada Bankada Getrude Monis, PD, konaba salariu minimu hatete katak Governu mak tenki dekreta lei Kodigu Laboral.
“Tuir lolos ita bele aprova lei Kodigo Laboral lalais, se bele Governu mak dekreta, tanba Governu mak hatene liu kondisoens ekonomia iha rai laran.”
