“Iha fulan april 2010 ami hari’i Projetu Observasaun Parlamentu ou POP. POP ne’e hari’i tanba nesesidade ida atu asegura povu asesu ba prosesu legislativu ne’ebe mak lao hela iha Parlamentu Nasional liu-liu Komisaun A. Ami servisu besik liu ho Komisaun A ne’ebe mak kaer responsabilidade atu halo aktu legislasaun ou produs lei sira ne’ebe mak relasiona ho vida povu ninian,” hateten Diretor Ezekutivu JSMP, Luis de Oliveira Sampaio, iha nia servisu fatin, Colmera foin lalais.
Diretor Sampaio sublinya liu tan katak objetivo seluk husi hari’I programa POP atu buka meus oinsa para bele lori parlamentu sai ba povu tamba ne’e JSMP halo aktividade barak hanesan diskusaun ho povu no konvida Membrus Parlamentu sira atu partisipa hotu. Nomos wainhira debate asuntu kona ba lei, JSMP konvida reprezentantes povu nian hanesan autoridade lokal, lia nain sira nomos reprezentante juventude sira.
Iha biban seluk, Deputado Antoninho Bianco, FRETILIN, ne’ebe partisipa ona hanesan orador ba programa POP hateten katak interakasaun Parlamentu no sosiedade sivil buat ida ne’ebe padrao iha nasaun seluk.
“Hanesan iha rai hotu-hotu Parlamentu tenki iha akomphamentu husi parte sosiedade sivil ba funsionamentu orgaun sobrania nian. Liu-liu iha ne’e ita kolia kona ba Parlamentu Nasional nia funsionamentu. JSMP iha programa ida ne’e hau nia hanoin positive,” hateten Deputado Bianco.
Nia mos hateten katak, programa POP sai hanesan barometer atu sukat funsionamentu Parlamentu nian iha plenaria, iha komisaun, no mos kontribusaun husi Deputadu sira sira nian ba fungsionamentu diak ba dezemvolvementu nasional.
“Hare ba ida ne’e hau husi comisaun A senti katak JSMP halo servisu daik atu deputadu/da sira, no Parlamentu sira rasik bele hare sira nia relatoriu hodi halo evaluasaun hodi hadia fungsionamentu orgaun soberania ne’e,” haktuir tan Deputadeo Bianco.
