Unidade Vulneravel (VPU) Polisia Nasional Timor-Leste, PNTL, unidade ne’ebe importante los iha rai laran tanba fo assistensia no suporta ba populasaun liu liu sira ne’ebe ho kondisaun vulneravel.
VPU nia servisu liu-liu atu atende kona ba kazus Violensia Domestika maibe dala ruma hetan failhansu tamba laiha transporte.
Hare ba condisaon hanesan ne’e iha 2011 Parlamentu no Governu oferese kareta atu fo ba Unidades VPU iha distritu 13 hodi halao sira nia servisu, maibe to’o agora kareta hirak ne’e seidauk to’o unidades VPU iha rai laran.
“Ami halo fiskalizasaun ba iha distritu-distritu, ami hare katak seidauk iha kareta ida [hosi proposta] nebe Deputadu nain rua hatama nomos ami hotu-hotu apoia atu fo kareta ba iha Unidade Vulneravel iha 13 distritus, para Lei Violensia Domestika ne’e bele lao ho diak,” katak Vise Prezidente Parlamentu Nasional, Deputada Maria Paixao Nudar, PSD, iha Parlamentu Nasional (PN), Dili, semana (12/12).
Vise Presidente Paixao haktuir tan katak tuir los polisia nia Unidade Vulneravel tenki iha espasu ne’ebe diak I tenki iha kareta nebe diak, hanesan Deputadu sira aprova tiha ona atu oferese ba.
“Mas to’o agora kareta ne’e seidauk to’o iha sira nia liman hanesan iha distritu balu kareta sira ne’e ba para fali iha Komandante sira, nomos komandante sira mak uza fali kareta ne’e la fo ba Unidade Vulneravel sira,” hateteten tan Vise Presidente Paixao.
Iha biban hanesan Deputado Corneliu da Conceicao Gama, UNDERTIM, hateten katak wainhira PN aprova ona buat ruma ita tenki iha kontrola atu nune’e buat sira ne’e bele lao ho diak no tiur buat nebe mak intensaun.
“Kuandu hanesan ne’e tenki halo kontrola atu hatene tamba sa mak nune’e, ne’e ita tenki hatene nomos halo observasaon ne’ebe diak liu,” hateten Deputado Gama.
