Deputado Parlamentar, Mario Viegas Carascalao, PSD, fo hanoin katak sistema drenajem iha kapital Dili hosi tempu Portugeuse no to’o ohin loron seidauk halo foun fali.
“Ita nia planu urbanizasaun ne’e laiha mak akuntese drenajem be’e sira ne’e halai fatin mos lahalo foun, ne’e maka akuntese banjir [be’e sai] ne’e wanhira udan mai,” tenik Deputado Carrascalao, iha Parlanentu Nasional, semana kotuk (12/6).
Nia mos deklara tan katak, sistema drenajen ne’ebe iha agora dadaun ne’e sei uza desde sistema Portuges ninian. Iha tempu Indonesia mos la troka nomos iha tempu ukun an ne’e mos sei nafatin no katak condisaun ne’e maka halo wainhira udan mai no kanu ne’ebe kiik entaun bele halo be’e sira ne’e nalihun iha istrada laran no to’o iha komunidade sira nia uma laran.
Entretantu tuir Deputado Mateus de Jesus, Independente, iha komponentes rua maka presiza fo atenzaon ba iha kapital Dili.
“Primeiru governu tenki hadia kanu sira ne’e bele sai ba tasi atu nune’e kuandu udan boot mai be’e sira ne’e bele halai diretamente ba monu iha tasi. Segundu fila fali ba ema komunidade presija mos iha konsiensia boot ida katak kota ne’e ita nian, fatin ne’ebe ita hela ba nene’e mos ita nian ne’e duni labele soe foer arbiru halo intopidu ba kanu sira ne’e,” tenik Deputado de Jesus.
Iha biban seluk komunidade Mateus (apelido la fo sai) hateten kata iha nia areas iha Bairro Pite, wainhira udan be’e sempre nalihun iha estrada halo populasaun lao labele nomos sempre tama to’o uma laran.
“Husu ba governu atu hadia kanu sira ne’e no mos habelar kanu sira ne’e hodi bele akumula be’e sira ne’e wainhira udan mai atu nune’e be’e labele nalihun nomos labele tama to’o uma laran,” hateten komunidade Mateus.
