“Tanba ida ne’e bele impede ba komunidade sira liu-liu estudante sira nebe hakarak ultrapasa ba estrada sorin,” hateten Mateus Kampus Pinto, iha Palacio Governu oin, Dili, semana kotuk (16/12).
Tuir komunidade ne’e katak ida ne’e sai refleksaun bo’ot ida ba Governu oinsa para bele rezolve lalais problema lampu trafiku mate ne’e.
“Tanba ida ne’e nia impaktu bo’ot tebes ba ema sira lao ain, lori kareta no mos lori motor sira bele soke malu hela deit.”
Iha fatin seluk Deputadu Independenti Mateus de Jesus, Komisaun G, hateten katak,atu labele mosu asidente no engarrafamentu iha estrada laran presiza tenki lampu tranjitu funsiona ho diak.
“Hodi bainhira mos ami koalia ona ho Ministeriu kompetente iha Infrastrutura nebe mak liga ba fatin sira ne’e hotu oinsa mak sira bele fo atensaun masimu ba iha fatin sira ne’e,” hatete Deputadu de Jesus.
Iha fatin hanesan Deputadu Pedro da Costa, Prejidenti Komisaun G, trata asuntu Infrastrutura katak iha audensia Komisaun G rekomenda ona ba Ministeriu kompetente liu-liu Transportes e Terestre oinsa atu bele rezolve lampu tranzitu iha Dili laran lakan-mate.
“Importante tebe-tebes atu halo moris fali atu nune’e bele minimiza engerafamentu iha sidade laran ne’e,” Deputado da Costa haktuir.
Tuir informasaun nebe mak husi Komisaun G rona husi Diresaun Transportes Terestre nian katak iha fulan Dezembru nia laran sei hadia ona lampu tranzitu sira iha sidade Dili.
Wainhira TDW koko konfirma asuntu ne’e ba iha Diresaun Nasional Transportes Terestre maibe la konsege tanba la iha reprezentante ida protu atu koalia ho media.
