Tuir Vise Prezident Parlamentu Nasional, Deputada Maria Paixao, partidus politiku sira wainhira tuir Eleisaun 2012 mak la hetan liu pursentu tolu asentu parlamentar nia tenki disolve nia aan ou hakarak kontinua moris sei Governu la fo tan subsidiu.
“Governu ou Estadu fo rekonhese ba sira nebe kadeira iha Parlamentu Nasional,” hateten Vise Prezidente PN Paixao, semana kotuk (10/12), iha PN, Dili.
Vise Prezidente Paixao hateten razaun katak wainhira partidu la manan eleisaun mak Governu fo ajuda ba sira mak ema bele loke partidu hanesan kios.
“Ne’eduni Estadu tau barreira ida, tau 3 pursentu para atu bele hare partidu sira nebe asentu iha Parlamentu.”
Nia husu partidu politiku sira wainhira lakon iha eleisaun tenki servisu makas atu nune’e bele hetan kadeira iha Parlamentu atu nune’e Estadu bele tau matan ba sira.
Entertantu Deputadu Mario Viegas Carascalao husi bankda PSD hateten katak, Governu tenki kria lei ida para partidu sira la manan iha Eleisaun la hetan kadeira iha Parlamentu lolos disolve tiha atu labele tama iha eleisaun iha tinan rua ga tinan tolu.
“Kuandu sira la hetan tur fatin signifika katak sira la hetan apoiu husi povu,” hateten Deputado Carrascalao.
Tuir Deputado ne’e mos katak iha Timor partidu tolu ka hat deit rai bele lao diak liu.
“Tanba ita hare partidu bara-barak kria ne’e laos ideolojia mak diferente mas ema nain hira deit mak hakarak sai lider.”
Deputadu Carrascalao hatutan tan katak partidu agora barak-barak mak mosu balun sei la hetan kadeira iha Parlamentu Nasional hafoin Eleisaun Jeral iha 2012.
“Kuandu hanesan ne’e sira ne’ebe hetan mos sei iha defisil tanba la iha partidu ida maioria absoluta tanba forsa fahe malu hotu.
