“Lei rua nebe mak ate agora parlamentu budu hela, to’o agora mak parlamentu hare liu konaba lei Veteranus da Rezistensia,” hateten Atai Monis Reprejentante Grupu 10 Junhu 1980, Trajedia Marabia, durante aksaun komemorativa ba Loron 7 Dezembru ne’ebe halao iha Jardin 5 de Maiu, Dili, iha semana kotuk (7/12).
Tuir Monis katak tuir los parlamentu nasional tau preoridade liu lei ne’e tanba veteranus ema ne’ebe sei moris hela.
“Sira la kategoria katak, dehan ida aas liu ne’e make ma fo tiha ona nia vida ba nasaun ida ne’e mak hakarak ukun aan lolos.”
Entertantu Maria Gloria, Reprezentante Asosiasaun das Vitima husi Distritu Dili hateten katak Estadu tenki tau matan ba ema ne’ebe terus iha teritoriu laran tomak liu-liu ba vitima sira nebe to’o ohin loron restus mortais seidauk hetan.
“Ida ne’e mos ami halo kontinuasaun husi CAVR, dadus nebe CAVR hatama tiha ona iha Parlamentu desde inisiu tinan 2002 hatama tiha ona maibe i’is nunka atu sai,” hateten Gloria.
Nia husu ba Parlmanetu Nasional bainhira mak bele aprova Lei Reparasaun ba Vitimas sira.
Enkuantu Vise Prezidenti Parlamentu, Maria Paixao, hateten katak horas ne’e dadauk parlamentu sei diskuti Lei Brankeamentu kapitais no Lei Seguransa Social, no aprova tiha mak foin bele diskuti tan Lei Reparasaun das Vitimas ninia para bele aprova.
“Aruma tiha lai lei veteranus ninian ne’e lai, fo tiha direitu veteran sira nian hotu tiha rohan ba rohan, hafoin ita bele hare fali Lei Vitima em jeral. I ita fo mos benefisiu ba vitima hotu-hotu em jeral,” hateten Deputada Paixao.
Tuir nia katak Lei Reparasaun ne’e fo benefisiu ba vitima hotu–hotu. “Ema milisia sai vitima tenki hetan benefisiu, entau se ida ne’e mak ita agora halo veteranus sira hamrik ita nia nasaun bele sai desorden.
