Tuir Director Nasional DNASE Calito Mota iha 2012 eskolas hotu sei simu osan 25 sentuavus per labarik atu sosa modo saida deit mak atu fo ba alunus sira han purzemplo hahan ne’ebe mak komunidade sira iha.
“Hau hakarak dehan deit katak tinan oin mai programa ne’e muda ona katak sei la fo tan koto, masin, mina maibe sei fo mak osan,” hateten Director Mota, semana kotuk (29/11) iha knar fatin, Ministerio Educasaun (ME), Vila Verde, Dili.
Iha fulan Janeiru 2012 ba oin labarik eskolantes sira sei han etu tamba fos resin husi tinan ida 2011 nian no sei aumenta modo ne’ebe Director sira sei aranja tanba ne’e mak labarik sira simu 25 sentavus. Ossan ne’e eskola mak kaer rasik.
Antes atu tama ba tinan foun 2012 Director sira husi Centrus Ensino Baziko Timor laran tomak hamutuk 202 ida-ida sei ba loke konta bankaria atu realiza objektivu ne’e.
Fulan janeiru Governo sei aloka osan ba eskola ida idak nia konta bankaria no Governo sei uza Director nia naran para atu aloka ba programa Merenda Eskolar tuir estratejia found ME nian.
“Hau hakarak hato’o ba Director sira katak uza didiak osan ne’ebe mak iha ne’e atu hodi implementa programa merenda escolar e keta uza fali hanesan privadu. No husu atu uza osan ne’e didiak atu nune’e programa merenda escolar ne’e bele lao ba oin,” Director Mota hatutan tan.
Entertantu Prezidente Sindikatu Professores Timor-Leste (SPTL) Francisco Da Costa Fernandes, hateten katak halo mudansa hanesan ne’e presiza iha kontrola adekuadu no regular.
“Sistema implementa programa ida ne’e kompetensia Ministerio Educasaun nian maibe ita tenki kontrola katak buat ne’ebe mak loron ida atu han saida, semana ida han dala hira. Ida ne’e tenki planeadu kedas,” hateten Prezidente SPTL Fernandes.
Tuir nia mos katak ho inisiative foun ne’e la bele entrega tiha ba Director sira depois sira hatama deit relatorio ba iha ME ka ou Rejional maibe sira mos tenki kontrola husu ba inspectores atu halo mos kontrola ba implementasaun programa ne ‘e lao ka lae.
“Labele tun ba husu deit ba professor ne’ebe mak kaer finanseiru.”
Iha parte seluk Rildus da Silva nudar komunidade hateten katak presiza troka duni menu ne’ebe iha se kontinua nafatin hanesan fo impaktu la diak duni ba labarik sira nia saude no sira bele hetan malnutrisaun.
“Tamba durante ne’e ita hare hahan sira ne’ebe labarik han hanesan koto fila ba uma sira sempre hateten ba ami inan-aman sira katak sira han koto ne’ebe da’an latasak ne’e,” hateten Komunidade da Silva.
Tuir komunidade ne’e hateten katak diak liu han hahan produto husi ita rai laran rasik ne’ebe babain han iha uma diak liu tan duke han koto sira ne’ebe da’an la tasak ida ne’e fo impaktu ladiak ba labarik sira nia saude.
