Hare’e ba dificuldade ne’ebe Timor-Leste infrenta iha tinan 2006 iha Setor Edukasaun ne’ebe iha faltas barak, Embaisada Amerikahusu Eskola Internasional atu implementa programa edukasaun ne’ebe aas ba labarik husi estrangeiru no Timoroan balun iha Dili.
“Ami (QSI) iha eskola hamutuk 37 iha nasaun 25 ne’ebe diferente iha mundu. Ami hahu [iha Timor] ho estudantes hamutuk 13 maibe agora iha estudantes hamutuk 100 kompostu husi nasaun Australia hamutuk 22, Amerika nain 13, 25 husi nasaun seluk no inklui Timoroan hamutuk 14, ho idade tinan tolu to’o remata sekundario,” dehan Director Dr. Jason A. Moore, foin lalais (1/12) iha edifisio QSI iha Fatuhada, Dili.
Nia hatutan katak eskola QSI iha sistema ne’ebe especial katak hanorin tuir abilidade estudantes rasik laos tuir estudantes nia tinan. No sira atende labarik feto hamutuk 50 no mane 50. Profesores hamutuk sanulu resin hat husi estrangeiru. Professres Timoroan laiha maibe asisti profesores tanba nivel edukasaun nee’be diferente tebes, maibe ba futuru iha profesores Timoroan nain rua tanba agora dadaun sira hetan bolsu estudu kontinua estudu iha Hawaii iha America no New South Wales iha Australia.
Nia hatutan katak ba estudantes eskola QSI tinan ida selu U$15.700 no iha estudantes Timoroan nain hat ne’ebe hetan bolsu estudu selu U$100 ba tinan ida.
Iha parte seluk estudante sekundario Timoroan, Maria A. dos Reis, hateten katak nia tama iha eskola internasional QSI bainhira remata presekundaria, no nia eskola iha QSI tinan rua ona aprende buat barak tanba QSI eskola ne’ebe diak.
“Tuir hau eskola ne’e diak tanba ami aprende buat barak iha ne’e no bainhira ami lahatene sira koko esplika ida–ida nune’e ami bele komprende diak liu tan. No eskola ne’e iha livru kompletu lahanesan eskola seluk ne’ebe menus livru. Material ne’ebe ami aprende mak hanesan lingua Ingles, Matematika, Musika, Arte, Drama no sport,” dehan estudantes Reis iha eskola QSI.
Nia hatutan katak sira tama eskola tuku walu to’o tuku hat lokraik meudia han iha eskola no alende aprende lingua Ingles sira mos aprende lingua Fransa. Bainhira husu konaba osan eskola nia katak nia parte lahatene tanba osan ne’e so inan aman mak hatene maibe nia dehan deit selu karun.
Tuir Director Eskola QSI Moore QSI nia eskola importante ba Timor-Leste tanba uza modelu edukasaun husi Estadus Unidus America no nivel ne’ebe as ba estudantes Timoroan bainhira tama iha universidade.
Nia parte gosta bainhira eskola QSI iha estudantes 50 pursentu husi Timoroan no 50 pursentu husi internasional tanba ne’e agora dadaun eskola QSI halo diskusaun ho eskola publiku no privado sira iha Timor–Leste atu servisu hamutuk nune’e estudantes sira bele troka malu ideias konaba kultura.
