Rejultadu fiskalizasaun ne’¬ebe Membrus Parlamentu halo iha Distritu Enklave Oe-cuse subdistritu Pante Makasar katak estudante hamutuk nain 40 halao aprendizajen tur deit iha rai tanba la iha meja no kadeira ba sira.
“Ami ba fatin Boboleo, suku Abokasia subdistritu Makasar ami hare kondisaun eskola ida neba pesimu liu,” hateten Deputadu Francisco Branco, FRETILIN, iha Plenaria Parlamentu Nasioanl (PN), semana kotuk (5/12).
Tuir Deputado Branco ka¬tak iha Eskola Vila iha Pante Makasar iha salas rua deit no la iha meza no kadeira.
“Tanba Enclave Oe-cusse 52 escolas maibe 20 mak hadia ona maibe 32 mak kondisaun la diak,” hatutan tan Deputadu Branco. “Kondisaun ida hanesan ne’e halo ita nia laran taridu tebes.”
Entertantu Vise Prezidenti Komisaun F, Deputado Francisco Jeronimo, FRETILIN, hateten katak eskola sira ne’ebe horas ne’e dadauk nafatin la iha meza kadeira dala barak sira hato’o tiha ona ba Governu, liu liu Ministerio Edukasaun, maibe Governu mak matan taka hela.
“Dalaruma sira la tau importansia ba Edukasaun maibe sira fo fali importansia ba sosa kareta ou sosa buat sira nebe mak dala barak ita hare la halai hanesan politika ida nebe Estadu ne’e rasik desidi iha tempu hahu ukun rai ida ne’e,” dehan Deputado Francisco.
Tuir nia mos katak Governu hateten hakarak fo atensaun ba Setores Saude no Edukasaun maibe realidade la fo konsiderasaun ba areas rua ne’e.
“Lalika dok tan, iha Dili laran deit [estudantes] balun sei tur rai, aat liu tan.”
Wainhira TDW koko konfirma assuntu ne’e ba iha Ministeriu Edukasaun la konsegue hasoru ho reprezentate prontu atu koalia ho media.
