Edukasaun menus, ladun iha reprezentasaun masimu feto iha estrutura partidu nian no pozisaun iha foti desizaun nian iha partidu laran, falta komunikasaun no informasaun, falta de konhesementu no mos sistema valores patriarchal ne’ebe dominante mak dezafius feto sira hetan kona ba asesu ba direitu partisipasaun politika nian.
“Estadu mos iha responsabilidade atu promove partisipasun feto iha vida politika, tengki kria condisaoens politika iha eskola, kria kondisoens iha servisu fatin sira ne’e para feto mos bele partisipa. Laos partisipa para halo numeru deit mais partisipa atu lidera,” hateten Sekretariu Jeral Partifu FRETILIN, Mari’i Alkatiri, iha salaun Delta Nova, Dili semana kotuk (06/12).
Nia hatutan katak se-see mak iha kapasidade atu lidera tengki rekunhese nia kapasidade no mos katak maluk feto sira ne’ebe eziji direitos tengki hatene responsabilidade mos, laos direitus atu partisipa deit mas tuir fali laiha responsabilidade atu halao servisu.
Iha parte seluk Maria Filomena Babo Martins, Chefe Departemantu Formasaun e Educasaun, Sekretaria Estadu Promosaun Igualdade (SEPI), hateten katak hare ba preokupasaun katak maluk feto barak mak laiha kunhesementu kona ba vida politika mak motiva SEPI atu halo inkontru dala hira tutuir malu par bele motiva feto sira liu-liu oinsa mak sira bele kandidata aan ba iha pozisaun aas iha vida politika.
“Atu promove Partisipasaun Feto iha vida politika, Sekretariadu Estadu koko halo ona inkontru ho feto sira iha Partidus Politika, oinsa para atu bele motiva sira atu nune sira bele partisipa iha dezenvolvimentu nasional, liu-liu iha vida politika.”
Chefe Martins tenik mos katak foin lalais Partidus Politikus 18 hosi 22 ne’ebe rejistu aprova atu tuir eleisaun jeral iha 2012 assina plataforma de asaun ida atu garante feto nia partisipasaun iha vida politika liu-liu feto iha partidus politikus atu nune’e bele hare ba oin oinsa maka atu promove partisipasaun feto ho aktivu liu iha vida politika.
