Grupu Mulheres Parlamentares Timor-Leste (GMPTL) organiza Conferensia Nasional ho tema “Haforsa Lideransa no partisipasaon feto Iha Elisaun 2012” atu enkoraja feto Timor-Leste atu kaer knaar lider no atu partisipa iha Eleisaun Jeral 2012.
Conferensia nasional ne’e halao iha iha Salao Delta Nova, Comoro, Dili, foin lalain (6/12).
“Kuandu ita kolia kona ba liafuan lider hau hanoin katak ita hotu hatene, ita hotu rona maibe hau fila hare iha dizionariu katak lider ema ida nebe governa, ema nebe bele halo inspirasaun ba sira seluk nomos sai hanesan kabesa [ulun] ba buat ruma. Lider mos ema ida nebe responsible ba ema seluk, bele komanda ema seluk, bele sai chefe ba politika ruma ida ka organizasaun ida, maibe ema ida ho influensia poder, ema ida nebe bele lidera,” katak Milena Pires, Membru Komite Timor-Leste ba CEDAW (Konvensaun halakon Formas Diskriminasaun Hotu- hotu Kontra Feto).
Membru CEDAW Pires esplika tan kona ba CEDAW hanesan akordu internasional ida nebe hare liu-liu kona ba feto ho hare ba labarik feto nia direitu no define mos prinsipuis no konseitus nebe relasiona ho konduntas ho obrigasoens Estadu nian atu garante direitu Feto no Labarik Feto hetan atensaun ne’ebe presiza.
“Hare ba esplikasaon hirak ne’e ita konkorda katak feto ho mane iha poder nebe hanesan wainhira atu sai lider ba organizasaon ruma ou lidera ba vida politika. Wainhira feto hakarak sai lider ita mos harak sira mos bele priense condisoens hotu-hotu nebe fo sai iha disionariu,” nia haktuir tan.
Iha eventu ida ne’e marka prezensa mos husi Sekretariu Jeran Partifu FRETILIN, Mari’i Bin Alkatiri, hateten katak importante liu mak fo edukasaun kona ba oinsa mak feto mos bele sai lider ba partidus politikus ba iha Distritus mos la os deit iha Kapital Dili.
“Hau hanesan lider politika ida hau kontenti. Hau mai hanesan fo pontu devista, fahe hanoin ho maluk feto no maluk mane sira iha ne’e. Konferensia sira ne’e importante tenki continue halo laos iha Dili deit, halo mos iha distritu sira para ita bele komesa bele fo educasaun politika ba asuntu espesifico ida ne’e,” hateten SG FRETILIN Alkatiri.
SG Alkatiri tenik tan katak feto nia partisipasaun iha vida politika mesmu obstaklu barak-barak maibe iha pontensialidade mos boot tebes, komesa hare ona feto nia partisipasaun ne’e ho kualidade ona. “Hare iha parlamentu partisipasaun feto nian iha kualidade no iha sentidu responsabilidade. Bele hadia diak liu tan.”
Konstitusaon Republika Demokratika Timor- Leste (RDTL) ninian garante ona direitu ne’ebe hanesan ba oportunidade no asesu hanesan entre feto ho mane. Direito de Igualidade Feto nian define ona iha artigu 16 no 17, no igualidade partisipasaun ba feto no mane iha moris politika garante ona iha Artigusd 46, 47 no 63 Kontitusaun nian.
