Proposta Aumenta fundus Numeru 108 ho montante $4 Milloens konaba projeitu lei sukat rai iha distritus ne’ebe aprezenta husi deputados
iha Parlamentu Nasional, Dili, semana kotu (21/11), pasa iha votasaun final ho votus afavor 34, abstensaun 3 no kontra 2.
Objetivu lei ne’e atu atu bele fasilita Ministerio Justisa hodi bele resolve problema sukat rai ne’ebe akontese iha rai laran.
“Aumenta tan U$ 4 Miloens ba Ministerio Justisa atu hare ba problema sukat rai iha Timor-Leste laran tomak nune’e mos parlamentu halo hela diskusaun ba lei terras no propriodades. Se parlamentu mak aprova lei ida ne’e implementasaun tenke asegura ona ema hotu-hotu iha direitu ba rai tanba ne’e ami aloka orsamentu ba iha governu halo kontinuasaun ba programa sukat rai no kompesensasaun atu ema hotu-hotu iha direitu ba rai,” dehan Deputada Carmelita Monis, CNRT, nudar proponete ba Proposta Numeru 108.
Deputada Monis hatutan katak proposta ne’e inportante tebes no Timor-leste presiza duni lei terras no propiodades tanba problemas rai iha territorio tomak kompleksu tebes no difisil atu resolve no komunidade barak mak ijiji ba sira nia direitu ba rai.
Iha parte seluk Ministra Justisa, Lucia Lobato informa katak nia parte konkorda ho proposta editamentu ne’ebe aprezenta husi deputados sira atu aumenta $4 milloens atu halo kontinuasaun ba projeitu sukat rai iha teritorio tomak.
“Hau konkorda ho editamentu ne’ebe atu aumenta tan U$4 miloens ne’e ho rajaun atu halo kontinuasaun ba projetu ARD ne’ebe governu Amerikanu liu husi USAID husik hela, tanba servisu ne’ebe sira implementa deit ba fatin balun deit no fo ona benifisiu ba komunidade sira. Ne’eduni iha biban ne’e hau hanoin governu bele hola responsabilidade atu halo kontinuasaun ba sukat komunidade nia rai no fasilita mos governu atu adiministra rai sira ne’ebe nain iha ona no rikusoin atu hatama iha dadus informatiku ne’ebe sei hamosu,” dehan Ministra Lobato.
