Tuir dadus ne’ebe iha kazus Violensia Domestika (VD) kontinua aas iha rai laran no halo Presidente da Republika (PR) Jose Ramos Horta konsidera nia aan rasik falha tanba la konsege redus numeru violensia domestika iha Timor-Leste bainhira kaer kargu nudar Presidente da Republika.
“Iha violensia barbarak iha dalan no iha uma. Nudar Xefe de Estado hau rekuinhese falha tanba la konsege hapara Violensia Domestika hasoru inan no feton sira maibe nafatin barak iha Timor-Leste tomak,” hateten PR Ramos Horta iha nia diskursu durante serimonia selebrasaun Loron Indepedensia ba dala 36, iha palasio Presidente Aitarak laran Dili, semana kotuk (28/11).
PR Horta hatutan katak nudar presidente no sidadaun ida, nia sente satisfeitu tanba bele kontribui liu husi dalan ka modo simples hodi restaura paz no seguransa iha ita nia cidade, bairo no aldeia sira.
“Maibe iha uma kain barak iha rai laran seidauk iha paz. Tuir lolos uma kain iha Timor ne’e lulik hanesan igreja maibe tranforma fali sai fatin ba mane sira hodi viola feto sira nia direitu,” haktuir tan Pesidente Ramos Horta.
Nia mos rekonhese katak nia sente moe bainhira numeru kazu violensia domestika kontinua aas iha rai laran no tanba inan sira iha realidade kontinua sai vitima iha uma kain laran.
Nudar Presidente nia mos rekomenda ba povu katak hare uma hanesan sagradu ne’e duni iha uma laran labele iha violensia hasoru feto no labarik sira tanba uma mak fatin domin no sagradu.
“Se feto no labarik la sente seguru iha uma laran entau sosiedade ne’e kanek bo’ot.
