Hodi prepara ba partisipasaun aktivu durante Eleisaun Jeral, Feto Politika Partidu Demokrata (PD) halao Segundu Kongresu ho tema “Haforsa Feto Demokratika” hodi hametin estruktura Organizasaun Feto Demokrata (OFD) PD.
“Ami hakarak halo mudansa ba ami nia estatutu tanba ami nia estruktura tuan. Estruktura iha aldeia laiha mais agora ba oin ami tenke iha ema nain 22 mak tur iha estruktura. Alende halo mudansa ba estruktura ami mos hakatak fo hanoin ba feto maluk sira atu halo preparasaun diak ho bele reforsa Partidu Demokratiku atu hetan vitoria iha elisaun 2012-2017 mai,” dehan Presidente OFD, PD, Getrudes Monis, iha semana kotuk (26/11), iha Salaun CNE, iha Dili.
Presidente OFD Monis optimista PD sei manan iha Elisaun 2012 tanba ho esforsu ne’ebe OFD no partidu iha estabelese ona estruktura iha baze hanesan distritu to’o iha aldeia.
Nia haktuir tan katak Feto PD sai parseiru hodi lori dimensaun jender hanesan buat importante atu alkansa demokrasia tanba atu hare asuntu sosial tenke iha koperasaundiak entre man no feto.
Iha lidun seluk Presidente Feto Parlamentar iha Parlamentu Nasional, Josefa Alvares Soares, hateten katak kongresu ne’ebe OFP halao diak tebes tanba atu haburas demokrasia maske iha partidu barbarak maibe iha prinsipiu ida katak respeita demokrasia.
“Hau kontente tebes hare estruktura ne’ebe sira [OFD] iha tanba maioria husi joventude ne’e mak ita dehan futuru jerasaun foun ne’ebe sei ukun rai ida ne’e ho prinsipius no ideias ne’ebe foun. Karik sira manan maibe prinsipius ida deit ne’ebe partidus organizasaun feto hotu-hotu iha mak dezenvolvementu rai ida ne’e nian,” hateten Deputada Josefa.
Iha nia parte Presidente PD, Fernando Lassama de Araujo, hateten mos katak nia orgulho tebes ho OFD nia servisu iha tinan liman foi liu nia laran.
“Hau sente orgulho tebes durante tinan lima nia laran lao hamutuk ho imi Organizasaun Feto Demokrata (OFD) no Organizasaun Joventude Demokrata (OJD) mak sai hanesan liras ba Partidu Demokratiku atu semo do’ok to’o iha mehi ne’ebe PD iha futuru,” dehan Presidente PD de Araujo.
PD President de Araujo rekomenda ba kongrisista sira atu servisu makas hodi hadau poder politika liu husi Elisaun Jeral 2012 tanba se poder politika lahetan PD sei labele halo buat ida.
