Prezidente da Republika (PR) Jo¬se Ramos Horta hateten katak Presidente da Republika Indonesia Susilo Bambang Yudhoyono apoio makas tebes Timor-Leste nia dezeju lijitimo atu sai membru Assosiasaun Nasoens Sudeste Aziatiku (ASEAN).
“Hau sita ita nia diversidade kultural no ita nia kbit atu domina lingua barak. Timoroan kunhesido hanesan nasaun sira ne’ebe mak koalia lingua barak iha mundu. Ho laran ksolok hau hakarak dala ida tan fo hatene sai ba ita bo’ot sira karik Timor-Leste karik bele tama ASEAN iha tempo badak,” hateten PR Ramos Horta semana (28/11) iha Palasio Prezidensial iha Aitarak Laran, Dili.
Tuir PR Ramos Horta Governo tenki nafatin esforsu no proaktivu liu hodi adopta no aplika lejislasaun no reajusta normas no mekanismo sira hodi bele kondiz no kumpri rekezitu teckniko legal molok sai membru Permanente ASEAN.
Timor-Leste tuir jeografia hola parte Sudeste Asiatiko no tuir Presidente Horta nasaun nia interese imiadiatu no medio prazu maka impoe rasik ba hodi halo adaptasaun total ba rejiao ne’e, sem fo prejuizo hodi halakon fali ita nia karakter identidade nasional rasik.
Entertantu Sekretariu Jeral Partidu Opozisaun FRETILIN, Marii Alkatiri, hateten katak ema hotu hotu hakarak atu tama ba ASEAN mas mos tenki prepara para tama ASEAN tanba vatajem adezaun ba assosiasaun ne’e depende Timor-Leste prepara aan ka la’e.
“Ita tenki prepara didiak ita nia a’an iha Ministerio hotu hotu para bele tama ASEAN, ne’e signifika ita tama ne’e iha vantage,” hateten SJ Alkatiri.
