Relasiona ho Orsamentu Jeral do Estado (OJE) ne’ebé mak agora dadaun Deputadus Parlamentu Nasional (PN) no Representantes Governu sira debate namanas iha PN sai preokupasaun bo’ot ba parte academia husi Universidade sira iha Kapital Dili tanba tuir Dosente sira nia hare governu ladun fo importansia ba area Edukasaun nian.
Tuir Dosente Rita Fatima de Viegas, Universidade Dili (UNDIL), semana kotuk (15/11), iha ninia servisu fatin hateten nia parte duvida ho debate orsamentu tinan ida ne’e tanba governu ladun fo importansia ba iha area edukasaun nian no katak tuir lolos area ida ne’e importante tebes ba nasaun.
“Hau hare ladun fo importansia ba asuntu Edukasaun nian, inklui mos Saude no Ekonomia. Tuir lolos area tolu ne’e tenki tau perioridade makas, tanba maioria povu sira ne’e moris husi ne’e, liu-liu Ekonomia,” hateten Dosente Viegas.
Dosiente ne’e hatutan tan katak Governu halo nia planu debate orsamentu iha Parlamentu Nacional tenki halo programa tuir lolos ba sector nebe mak importante liu ba nesesidade povu nian, hanesan iha area edukasaun, saude, inklui mós ekonomia.
“Ho nune’e ita bele hasai ita nia ema husi kiak no mukit. Governu presiza hadia povu nia moris liu husi sector ne’ebé mak importate hanesan ohin hau temi tiha ona, importante liu mak tau importansia ba sector agrikultur sira, tanba maioria povu ne’e moris ho agrikultura,” teknik nia.
Tiur Dosene Viegas orsamentu ne’ebé mak atu aloka ba programa hirak ne’e tenki tuir duni ninia programa atu nune’e povu bele senti ninia benefisiu.
Entretanto Dosiente Alex Pires, husi Fakuldade Ekonomia, Universidade da Paz (UNPAZ), iha Dili, governu ladun fo duni importansia ba area edukasaun nian maske tuir lolos area ne’e importante duni no dala barak labarik ho idade sei kiik inan-aman laiha kapasidade atu haruka oan sira ba eskola, labarik sira ajuda inan-aman sira hala’o negosiu.
“Diak liu governu buka meius halo nusa mak bele rezolve tiha problema ida ne’e. Dala ruma labarik atu kontinua eskola iha Universidade sira labele kontinua estudu iha ne’ebá bazeia ba ekonomia. Governu tenki buka meius halo nusa mak bele resolve problema ne’ebé refere,” informa Dosiente Alex Pires husi fakuldade Ekonomia.
No mos Dosente husi Universidade Nacional Timor Loro sa’e (UNTL), Martinho Viegas Pinto, hateten katak atu hadiah diak liu tan futuru nasaun nian, liu-liu labarik inklui mós Joven sira, governu tenki hadiah uluk edukasaun no katak edukasaun buat diak e importante hodi eduka labarik sira.
Dosente Pino informa tan katak, labarik no joven barak mak lahetan edukasaun husi eskola, ho razaun ekonomia no laos area edukasaun deit mak sai perkupasaun povu nian, iha buat tolu mak sai perkupasaun boot ba povu nia moris, hnesan saude, ekonomia, inklui mó edukasaun.
