Relasiona ho komemorasaun Loron Mundial ba Konvensaun Nasional Direitu Labarik ne’ebe selebra iha loron 20 de Novembru, Komisaun Nasional Direitu ba Labarik (KNDL) halao aktividade vizita iha semana kotuk (17/11) ba labarik difisiente iha Asosiasaun Hi’it Ema Rae’s Timor (ASSERT), iha Becora, Dili.
Objetivu hosi vizita ne’e atu lori parte governu kompetente no parseiru sira ne’ebe durante ne’e sai mahon ba labarik bele are direitamente kondisaun labarik difisiente no atendimentu organizasaun ASSERT fo ba labarik sira ne’e.
“Inan-aman sira la bele sente katak sira [oan difisiente] ne’e izoladu no malisan ida ba sira. Ho ida ne’e hau lori governu kompetente, membru Parlamentu no parseiru UNICEF atu mai hare direitamente katak iha sosiedade sivil ida hakarak sai governu nia liman hodi tau matan ba labarik sira ne’e,” hateten Komisaria KNDL, Adalgiza Ximenes, durante halao vizita ne’e.
Iha fatin hanesan, Jacinto Gomes De Deus, actual Sekretario Estado Asistensia Social e Dezastre Naturais iha Ministerio Solidaridade Social (MSS), hateten katak la iha diferensia entre labarik ho problema difisiensia no mormal tanba ema hotu-hotu iha direitu hanesan. Nia hatutan relasiona ho selebrasaun Loron Mundial ba Labarik sira ne’ebe iha dia 20 de Novembru katak loron ne’e especial ba alin sira ne’ebe ho kondisaun difisiente.
“Loron ida ohin ne’e hanesan loron reflesaun ida ba ita hotu inan-aman no governu. Signifika inan-aman sira kontinua hadomi oan sira ne’ebe ho kondisaun difisiente no ami governu halo reflesaun ida oinsa bele trasa politika no programa atu bele fo tulun ba alin sira ne’ebe ho kondisaun difisiente sira ne’e,” hateten SE de Deus.
ASSERT nudar organizasaun sei entrega aan ba governu iha tinan 2012, maske durante ne’e governu fo apoiu ona maibe organizasaun ne’e ezisti nudar separadu husi governu ne’e duni iha tinan oin mai governu sei buka mekanismu atu jere.
“Tinan kotuk ami fo apoiu rihun $100 ba tinan ida ne’e ami sei apoiu tan $150, molok remata tinan ida ne’e solusaun ba estatus ASSERT nian klaru ona,” hateten SE de Deus.
Hatan konaba preparasaun assert atu tama ba governu, nia dehan transformasaun ba governu ne’e nudar fase ida ne’ebe eziste desde husi organizasaun ne’e hamriik.
“Ami pronto ona, maibe intensaun ne’e iha atu hatene oinsa ami nia atendementu ne’e sai nudar responsabilidade governu nian,” katak Director ASSERT Francisco De Deus Soares iha fatin hanesan.
Director Soareas esplika tan katak ekipamentus ne’ebe uza iha organizasaun ne’e hanesan kadeira-rodas karun tebes, ne’e duni ba tempu naruk servisu ne’ebe ASSERT halo tenke tama ba responsabilidade governu nian.
Director ne’e hatutan tan katak ASSERT to’o ohin loron hamriik hasoru difikuldade barak hanesan falta rekursu umanu.
Tuir estatistika ne’ebe Assert iha tinan 2010 to’o agora labarik ne’ebe ho problema difisiente different hamutuk 659 ho idade semana rua to’o 17. Labarik ho difisientes hosi 13 distritus maibe maioria husi Distritu Dili.
KNDL apoiu mos ekipamentus ba labarik difisente sira ne’ebe eskola atu bele hetan kadernu, lapizeira no pasta. Ba sira ne’ebe la eskola hetan susu been, sumu, sabun no apoio seluk tan.
