Fundasaun Action For Change (ACF) ne’ebe harii iha tinan 2010 ho objetivu atu kria aktividade ne’ebe inovativu no bele dezenvolve joventude iha area formasaun professional entrega certifikadu ba graduadus nain 80 iha area kuinesementu oin-oin.
“Ohin ami entrega certificado ba graduadus nain 80 ne’ebe mak mai husi kursu Ingles nain 30, Komputador nain 20, no Jestaun Publiku nain 30,” hateten Director ACF Jose de Jesus, iha ACF Training Center, iha Aitarak-Laran, Dili.
Director de Jesus hatutan katak ACF entrega sertifikadu ba joventude sira ba dala hitu ona no liu hosi inisiative akompanhamentu ACF identifika ona iha joventude hamutuk 46 mak hetan ona servisu maioria iha instituisaun Govenru no kompania local sira nune’e mos balun halao ona servisu iha distritu.
Tuir planu ACF ba oin katak sei prepara aan ho didiak liu–liu iha area rekursu umanu atu nune’e bele servi diak liu tan no dezenvolve joventude Timoroan liu husi formasaun professional.
Iha fatin hanesan reprezentante Sekretaria Estado Formasaun Professional (SEFOPE), Belarmino Da Cruz, hateten katak SEFOPE iha programa ida ho naran formasaun servisu fatin nia targetu ne’e ba grupo graduadus sira.
“Husu ba graduadus sira atu nafatin halo ligasaun ho Diresaun Nasional Formasaun Professional hodi hatene oinsa bele to’o ba iha programa formasaun servisu fatin nian. Atu hetan oportunidade ida ne’e depende mos ba ema ida-idak nia kreatividade,” dehan reprezentante SEFOPE da Cruz.
Partisipante Veronica da Silva ne’ebe tuir kursu Administrasaun Publiku iha ACF hateten katak nia orguillu tebes tanba maske ACF menus fasilidade maibe sira atende formandu sira ho diak durante fulan rua iha sira nia training center.
“Ba hau pesoalmente sente diak tanba iha formasaun ne’ebe ACF iha hanesan haruka ami formadus sira halao pratika direitamente iha instituisaun governu no kompania local sira atu dezenvolve kapasidade ne’ebe ami hetan durante fulan rua nia laran iha ACF,” dehan partisipantes Da Silva.
Iha okaziaun hanesan ACF mos lansa Website ida ho objetivu atu dezenvolve graduadus no joventude no atu sira hetan asesu informasaun ne’ebe akontese iha mundu tomak liu husi internet no website ne’ebe ACF oferese.
