Prezidente da Republika Jose Ramos Horta hateten katak informasaun konaba forsa estranjeiru, liu liu forsas Amerikanu atu harii baze militar iha Timor-leste informasaun ne’e falsu.
“Hau hakarak informa ba Povu tomak katak imformasaun ne’e la los no falsu tamba durante ne’e hau seidauk simu informasaun ruma kona ba ida ne’e. Tamba ne’e povu lalika fiar ida ne’e” dehan Prezidente Ramos Horta, in Dili, semana kotuk (11/11).
Konaba informasaun ida ne’e ne’ebe halo reakaun makas mosu hosi membrus defeza nasional F-FDTL, Prezidente da Republika Horta hateten Militar sira lalika rona informasaun ruma no halo kedas reaksaun maibe tenki estuda lai tamba buat sira nee politika.
Ramos Horta aumenta tan katak durante ne’e Forsa Estadus Unidus halao sira nia knar hanesan baibain tuir nia missaun no hasoru malu no halo enkontru dala barak maibe sira nunka koalia ida atu loke baze military iha rai laran.
Prezidente haktuir tan katak sekarik informasaun ne’e los nia rasik mos la konkorda tamba Timor-Leste oras nee iha paz no estabilidade nune’e Timor-Leste laiha nesesidade atu harii baze Militar Estadus Unidus iha rai laran.
Presidente hateten tan katak informasaun ida ne’e ema balun maka hakarak espalla iha komunidade nia le’et atu prejudika situasaun no aproveita mos tempu tamba besik ona ba Eleisaun Geral.
