Ahi ne’ebe mate lakan iha sidade Dili sei lakan 24 horas komesa 28 Novembru 2011 ba ion hodi rezolve problema komunidade neebe loron kalan hakilar konaba falta elektrisidade.
Deputadu Arao Noe, CNRT, hateten katak hahu 28 Novembru ba oin elektrisidade iha sidade Dili sei lakan 24 horas.
“Hau hakarak hatete katak ahi sei lakan 24 horas komesa 28 Novembru ba oin tamba instalasaun tore elektrisidade iha fatin hotu-hotu kuaze remata totalmente ho ida nee hau garante katak komesa 28 ba oin komunidade sei lahakilar tan konaba ahi,” dehan arao noe iha Parlanentu Nasional tersa feira ne’e.
Tuir Deputadu Noe katak durante ne’e ahi mate lakan iha kapital Dili tamba sei sentral eletrika sei uza hela jerador tuan sira ne’ebe ho kondisaun la permite ona tamba nee tekniku sira komesa troka ona ho jerador foun ne’ebe foin hola para atu nunee ahi bele lakan normal hodi fo naroman ba komunidade sira.
Entretantu lider opozisaun, Mari Alkatiri, FRETILIN, hateten nia fira katak ahi sei la lakan 24 horas iha 28 Novembru ba oin tamba jerador nebe monu iha fulan hirak liu ba mos sei iha neba hela seidauk foti no nia duvida oinsa ahi bele lakan komesa loron 28 Novembru ne’e ba oin.
“Hau Alkatiri mak lafiar katak ahi sei lakan 24 horas komesa 28 [Novembru] ne’e ba oin tamba ahi ne laos foin mak promesa maibe bebeik ona tan ne’e hau sente ida ne’e hanesan promesa ida ne’ebe halo para atu hetan votus maibe realidade laiha,” katak Lider Opozisaun Alkatiri, iha Salaun Konvensaun Dili, semana kotuk, iha Dili.
Nia aumenta tan katak ahi ne’ebe mate lakan tamba Governu Aliansa Maioritaria Parlamentar (AMP) laiha planu ida ne’ebe integradu.
Koalia kona ba ahi, AMP sei lahatudu realidade ba povu maibe sei koalia deit ho ibun tamba elektrisidade ne’e kestaun tekniku tenki resolve ho tekniku laos ho politiku,, nia hatutan tan.
Tuir Secretario Estado ba Sekretaria Estadu Eletrisidade, Agua no Urbanizasaun (SEAU), Januario Pereira katak jerador foun sira ne’ebe foin hola prepadu ona atu fo enerjia ba komunidade tomak komesa loron 28 Novembro ba oin nune SE Pereira husu ba komunidade atu aguenta oituan iha loron hirak nee nia laran.
“Ahi sei lakan komesa 28 Novenbro ba oin maibe semak lafiar tun ba hare rasik ho matan iha Hera neba mak mai koalia la bele tuur deit iha fatin mak koalia,” hateten SE Pereira.
Tuir komunidade DIili Jacinto da Silva, nudar mos negosiante iha Merkadu Comoro katak Governu tenki hatudu duni realidade tuir sira nia liafuan tamba durante nee guvernu promesa buat barak maibe laiha realidade.
“Ami ne’ebe hanesan negosiante ami presiza liu enerjia elektrisidade para sasan sira ne’ebe ami faan nee labele dodok ho ida ne’e ami husu ai husu ba Governu atu rezolve lalais problema ahi atu nunee ami bele halao ami nia aktividade nee ho diak,” hateten Da Silva iha Merkadu Comoro, Dili.
