“Ita tenki aprende moris iha kondisaun ne’ebe la halo ema moras. Familia tenki lori ema ne’ebe moras ba hospital atu nune’e doutor bele hare no fo aimoruk ba nia hemu tuir moras ne’ebe nia iha, labele hein moras ne’e todan mak ba hospital,” hateten Prezidente TR Ximenes semana kotuk (9/11) iha Edifisio TR, iha Caicoli, Dili.
Tuir Prezidente Ximenes ema matenek barak hateten ema buan laiha poder atu halo ema moras ka halo ema mate maibe ema mate tanba iha intervensaun ruma ema seluk ho itensaun aat. Ema seluk oho ho surik, katana, ho rama baku mate, fo veneno ba nia hemu moras. Bele mos tanba desleixu, laiha kondisaun diak ba saude, laiha limpeza, susuk tata, moras daet husi ema seluk, be mos laiha hahan laiha, la ba konsulta iha hospital bainhira moras. Nia hateten katak kondisaun barak mak bele halo ema mate laos ho buan nia kbit mak halo ema mate.
Nia haktuir karak tanba ema matekenek bele rasionaliza sasan mak sira la tauk buan tamba sira hatene katak ema buan laiha poder atu moras ka ema mate .
Prezidente ne’e haktuir mos katak iha Europa ne’eba mos ema fiar katak ema buan halo a’at ba ema seluk tamba ne’e dala barak sira kaer ema be sira konsidera ema buan hodi oho tiha. Sira halo buat ne’e tamba sira nia matan taka hela no sira fiar katak ema buan iha poder aat maka’as teb tebes.
Entertantu Madalena Freitas nudar komunidade hateten katak dala barak ita ema moris ne’e hanesan ne’e hanoin buat ne’ebe la iha razaun ne’ebe los bainhira hetan moras dehan mak buan mak halo ne’e costume Timor nian ne’ebe iha .
“Hau hanoin ita mak tenki aprende moris iha kondisaun ne’ebe la halo ita moras. Familia tenki lori ema ne’ebe moras ba hospital atu nune’e doutor bele hare no fo aimoruk ba nia hemu tuir moras ne’ebe nia iha labele hein moras ne’e todan mak ba hospital.”
Nia hateten tan katak tamba liu husi kondisaun ne’ebe ladun diak hanesan hahan la diak, be mos laiha, moras la ba hospital atu hetan tratamentu ba nia saude, la halo limpeza iha uma oin no mos baleta kuak, sira ida ne’e bele kria hetan moras no dala ruma bele mate.
