Sekretariu Estadu ba Sekretaria Estadu Formasaun Professional e Empregu (SEFOPE), Bendito Freitas, husu ba trabalhadores Timoroan nain lima ne’ebe foin daudauk desloka ba Korea do Sul atu servisu atu tenki lori imajen Timor-Leste nia no naran diak ba servisu iha rai ne’eba.
“Hau husu ba alin sira importante tebe-tebes mak mantein nafatin disiplina, servisu ho responsabilidade no respeita malu,” hateten SE Freitas foin lalais (27/10), iha SEFOPE iha Caicoli, Dili.
SE Freitas mos hato’o katak trabalahdores sira tenki disiplina servisu, laos atu ba buka halo problemas iha ema nia rai.
“Imi ba iha neba para servisu, buka osan, atu lori mai hadia familia, hadia imi nia future.”
SE Freitas husu ba tarablahdores nain lima ne’e katak wainhira sira fila mai iha Timor-Leste bele tuir kursu ruma kompletu bele ajuda ba Timor hodi halo konstrusaun, hadia Estadu ba futuru.
“Tanba ne’e mak ami hakarak hato’o ami nia dezeju ba ita bot, ba alin sira ne’ebe mak atu ba.”
SE Freitas mos hateten katak durante nia vizita iha fulan kotuk ba iha Korea do Sul katak trbalhadores ne’ebe ba servisu uluk iha Korea, agora sira kria klubu futebol ne’en iha ne’eba.
“Fin du ano sira sempre halo kompetisaun, ne’e ba imi balun keta iha skill joga bola karik, bele ba reforsa.”
Entertantu trabalhador ba Korea do Sul, Aderito Gonjaga hateten nia senti kontenti maibe prosesu tuir formasaun durante ne’e naruk tebe-tebes.
“Durante ne’e ami tuir formasaun ne’e hamutuk fulan sanulu nia laran, mak ami Ezame nasional. Ami barak mak tuir tes maibe kuaze hamutuk atus tolu mak hela,” hateten Trabalhador Gonzaga.
So sira ne’ebe liu ezema nasional mak haruka naran ba iha SEFOPE no hetan seleksaun ikus atu ba servisu iha Korea do Sul.
“Hau ba servisu iha Korea iha area fabrika metalika ninian.”
Tarbalhador ne’e dehan buat nia ba aprende iha Korea wainhira nia fila mai sei aplika iha Timor.
“Agora hau ba ne’e hau nia familia la iha kapsidade atu suporta hau entaun hau empresta osan husi BNU $2000 depois mak ami selu fali banku nian.”
