Sekretario Estado hosi Sekretaria Estadu Formasaun Professional e Empregu (SEFOPE) asina Note Entendimentu ho parseiru komunidade dezenvolvimentu Joventude sira hodi bele prepara joventude Timor–Leste iha futuru.
Parseiru komunidade Dezenvolvimentu Joventude ne’ebe asina Nota Entendimentu ho SEFOPE hamutuk 51 parseirus ne’ebe iha teritorio tomak ho total apoiu pagamentu hamutuk $139.202 husi Osamentu Jeral do Estado (OJE) 2011 ne’ebe aloka ba iha SEFOPE.
“Objetivu husi asina akordu ne’e hodi hametin liu tan koperasaun entre SEFOPE no parseiru formasaun professional ida ne’e ami halo tinan–tinan ho parseiru sira tanba sira mak sai hanesan kolaborador direitus liu-liu ba iha formasaun professional iha area teknika professional ba joventude Timor-Leste nian. Sira ne’ebe asina entendimentu ho centru ne’e hodi hatutan formasaun ba joventude hanesan pasu ikus ba Orsamentu Jeral do Estado 2011 ne’ebe aloka ba SEFOPE iha parte formasaun professional,” hateten SE SEFOPE Bendito Freitas, foin lalais (18/10) iha Salaun SEFOPE, iha Kaikoli, Dili.
Alende iha alokasaun ba iha area teknika professional iha mos alokasaun ba fundus estagiario nain 51 ne’ebe ba halao hela esperensia servisu iha parte instituisaun Governu nian, setor privado no seluk–seluk tan atu sira bele pratika iha ne’eba no bainhira kompania sira hare servisu diak entau kompania sira bele uza sira iha futuru.
SE Freitas hatutan katak treinamentu hanesan iha area Administrasaun, IT, Mekanika, Computador, Kustura, Turismu, Lian Ingles no seluk-seluk tanba ne’e mak SEFOPE kopera ho centru parseria formasaun professional atu bele fo formasaun ba joventude iha Timor-Leste.
