“Ita hare projetu sira ne’e ita Timoroan sira la servisu,” haten Deputadu Paulo Martins, CNRT, iha plenaria Parlamentu Nasional, semana kotuk (10/10).
Deputadu Martins hato’o ba Sekretariu Estadu (SE), Sekretaria Estadu FormasaunProfessional no Emprego (SEFOPE), Bendito Freitas, katak tenki hato’o ba emprezarius estranjeirus sira nebe halao obra iha Timor-Leste tenki involve trabalhdores Timoroan sira hodi servisu tuir projetu sira.
“Tenki simu ema Timoroan sira para servisu nune’e fo mos kampu trabalhu ba ita nia maluk sira,” hia haktuir tan.
Entertantu Deputadu Antonio Cardozo, Prezidenti Komisaun H, trata Asuntu Formasaun Professional, Juventude no Desporto hateten katak realidade ne’e la los ba Timoroan sira.
“Se trabalhador mak involve ema liur, la involve ema Timoroan, ne’e kompania halo sala,” hateten Deputadu Cardoso.
Nia hateten tan katak karik iha limitasaun de rekursu humanus entaun bele ema emprejariu estranjeiru sira mai investe para ema Timoroan sira bele servisu tuir hodi aprende neneik-neneik maibe bebeik bebeik bele Timoroan sira bele kaer rasik.
“Ita trabalhador sira tenki buka meus oinsa para ita Timoroan bele fo kampu trabalhu ba sira.”
Nia hatutan tan katak, dadaun ne’e iha Timor-Leste taxa dezempregu besik 50 pursentu.
“Sira nia abilidade to’o agora maioria mak mai husi Eskola Sekundariu, husik sira nia eskola tanba ekonomia la sufisiente hodi kontinua sira nia eskola,” haktuir tan Deputadu Cardoso.
Nia esplika katak Governu liu husi SEFOE haruka ona trablahador Timoroan balun ba Korea do Sul maibe seidauk sufisiente.
“Agora tenki politika ida nebe adekuadu atu kria mos kondisaun, la os deit tuir treinamentu maibe tuir treinamentu remata, depois Sertifikadu iha sira nia liman deit, maibe tenki asesu mos kampu trabalhu ba sira.”
