Relasiona ho kestaun ne’e governu Timor-Leste ho organizasaun ba empregador no traballador estabelese Komisaun Nasional kontra Traballador Infantil (KNTI) atu bele prevene labarik sira atu la bele involve aan iha servisu ne’ebe perigosu maibe asesu ba edukasaun.
“Hanesan dezafiu bo’ot ida ba ita atu prepara labarik sira hanesan futuru nasaun no sira la bele sedu liu terus tanba partisipa iha servisu ne’ebe todan ka perigosu ba sira nia saude ho ida ne’e mak presiza tau mata ba sira no kria protesaun ba sira atu bele hetan oportunidade ne’ebe igual ba formasaun; edukasaun hodi bele hetan futuru ne’ebe diak. Labele labarik sira mak ema utiliza barak liu ba servisu,” hateten Sekretario Estado da Formasaun Professional e Emprego (SEFOPE), Bendito Freitas, semana kotuk (13/10) iha sala enkontru SEFOPE, iha Kaikoli, Dili.
SE Freitas hatutan katak KNTI ne’e hanesan komisaun ida inportante tebes atu bele fo protesaun ba traballador labarik sira ne’ebe ho idade 18 mai kraik atu labele tama iha servisu ne’ebe ho kategoria perigosu ba sira nia saude no tanba ida ne’e mak governu Timor-Leste kria komisaun ida ne’e hodi involve ho reprezentante ministerio hot-hotu iha laran hodi bele fo atensaun ba labarik sira atu nune’e sira labele partisipa liu ba servisu no abandona estudu.
SE Freitas mos espera ho prezensa KNTI bele responde duni problema ne’ebe nasaun ne’e infrenta no presiza medidas atu bele prevene situasaun nee’be difisil no bele defikulta labarik sira nia saude.
Entertantu Komisaria Direitu Labarik, Adalgisa Ximenes, hatenten katak Timor-Leste iha tan ona komisaun ida atu bele fo atensaun masimu ba labarik sira atu la bele involve aan iha servisu ne’ebe perigosu ba sira nia saude maibe atu implementa ho diak komisaun ne’e presiza koperasaun diak entre komunidade no governu hotu atu bele hetan rezultado ne’ebe diak no tau sira nia interese as liu.
“Komisaun Nasional Direitu Labarik mos involve aan iha Komisaun Nasional Kontra Traballador Infantil atu ita bele iha planu ida hamutuk hodi bele hare situasaun no problema hamutuk ne’e mak komisaun nasional direitu labarik nia hanoin ita labele servisu ketketak,” hateten Komissaria.
Komissari ne’e mos espera katak ho servisu hamutuk sira mos bele minimiza problema ne’e no hasae populasaun nia konsensia no fahe nafatin informasaun ba populasaun sira katak servisu ne’ebe labarik sira halo ne’e la foravel ba sira no aspetu barak.
Komisaun nia servisu mak fo hanoin nafatin katak servisu ba labarik ho idade 18 mai kraik ne’e kontra sira nia direitu.
