“Sentral kik ba ita nia nesesidade la to’o,” hateten SE Pereira iha Parlamentu Nasional, iha Dili, semana kotuk (12/10).
Tuir SE Pereira katak edifisiu foun barak mak presija fo ahi hanesan Timor Plaza no mos edifisiu foun sira seluk.
Entertantu Deputada Fernanda Borges, PUN, hateten nia hetan lamentasaun husi komunidade nian relasiona ho ahi kontinua mate lakan iha komunidade Taibesi no komunidade Vila–Verde.
“Ne’e husi Vila-verde, ami hanesan povu kik, senti laran triste no senti hirus oituan konaba problema Eletrisidade nebe mate loro-loron horas lima to’o nen,”hateten komunidade Vila-verde iha ba Deputada Borges atu hato’o iha plenaria Parlamentu Nasional.
Deputada Borges hateten tan katak Eletrisidade mate fo impaktu ba inan feto nebe moras, kous ho kosok oan sai problema bot.
“Hau nia fatin iha Taibesi hau bele koalia tanba hau pesoalmente hau iha esperiensia loron ida ahi mate dala lima,” hateten Deputada Borges.
Deputada ne’e fo hatene mos katak fula fulan nia selu tuir kontador ninian, maibe povu Timor-Leste la iha servisu selu oinsa.
“Ami gosta selu duni maibe iha ahi, maibe ahi la iha ita selu ba saida.”
Iha fatin hanesan Deputadu Estanislao da Silva, FRETILIN, hateten tinan tinan sempre tau osan Estadu ba Eletrisade maibe ahi kontinua mate lakan to’o agora.
“Ami iha viola-Verde neba ne’e, horseik ahi mate to’o horas ne’en ka horas hitu hanesan ne’e,” hateten Deputadu da Silva.
Nia haktuir katak horas ne’e dadauk ahi mate at liu tan no nia husu SE Pereira atu klarifika problema ne’e iha ne’ebe los.
“Hau sei hanoin hela altura ne’e imi aprezenta programa Governu nian imi hotu hotu tama mai dehan hanesan ne’e, ami agora sei halo buat nebe imi la halo, maibe to’o agora tinan hat ona imi la konsege halo nafatin ne’e oinsa.”
Deputadu da Silva akuza Governu la halo buat ne’ebe promete ba povu.
“Hau hanoin fali imi hela deit fulan hira atu tama ona ba eleisaun, buat ne’ebe imi promete ba povu imi atu koalia oinsa ba povu.”
