“Iha Ermera até agora merenda eskolar la la’o ida,liu-liu iha Sub-distritu Letefoho até agora la la’o,”hatéten Deputadu Domingos Sarmento semana kotuk (03/10) iha plenaria Parlamentu Nasionál (PN).
Tuir nia, aihan ne’ebé lolos uza ba merenda eskolar ba estudante sira, rai iha armajen sai fohuk hotu. “Fós no koto ne’ebé tau iha armajen agora sai metan hotu,”nia kestiona.
Problema hanesan mós akontese iha Hatukesi,Suku Tohu Meta aldeia Bucolelo Distritu Ermera, komunidade sira lamenta kona-ba batar uut ne’ebé Ministeriu Edukasaun fo agora sai metan hotu.
“Tanba husu ba Ministeriu kompetente hahan sira ne’ebé fo ba labarik sira tenke hare para la bele fo moras fali ba labarik sira,”nia sujere.
Entretantu tuir Vise Prezidente Komisaun F Parlamentar Francisco Jeronimo katak Miinistru Edukasaun inkapasidade atu rezólve problema edukasaun nian inklui merenda eskolar.
“Sira labele rezólve ona, tanba problema ne’e akontese desde 2008,2009 ,2010 to’o agora sempre problema nafatin, ami diskuti ho sira hodi buka solusaun ne’ebé lolos maibé to’o ohin loron kontinua nafatin tanba sira halo jestaun ladiak no mós kordenasaun entre ministeriu ho ministeriu la’o ladun diak,”Jeronimo dehan.
Tuir deputadu ne’e katak problema merenda eskolar laos akontese de’it iha distritu balun de’it maibé iha Timor laran tomak problema hanesan de’it.
“Iha Kinta no Sesta ha’u iha Oecuse, eskola sira iha ne’eba la iha ona merenda eskolar no mós iha Suai mós la iha ona merenda eskolar,”Francisco tenik.
Francisco hatutan tan katak, problema ne’e akontese tanba Governu hakarak liu muda osan .
“Ministeriu Finansas buat ida hakarak transferensia hodi muda ba muda mai item sira ne’e hodi hamósu programa bar-barak ne’ebé latama iha orsamentu jeral estadu ne’e,”nia kestiona.
