“Kuadu orsamentu jeral tama ona iha parlamentu entaun aktividades hotu hotu tenki ser para , hodi konsentra hotu ba orsamentu,” hateten membru Momisaun A, Deputadu Domingos Sarmentu, FRETILIN, semana kotuk (10/10).
Deputadu Sarmentu hateten tan katak diskusaun ba Lei Rai Komisaun A halo diskuti to’o iha Maubara distritu Liquisa maibe sidauk hotu.
“Ba oin ne’e para lai, sei debate Orsamentu [Jeral Estadu], depois hotu tiha mak halo kontinuasaun debate ba lei ne’e.”
Deputadu ne’e mos haktuir katak Lei Rai parlamentu aprova tiha ona nia Jeneralidade no oras ne’e tama tiha ona ba diskusaun espesialidade iha Komisaun A laran.
“Lei ne’e ami komisaun A foin debate to’o artigu rua deit atui tama tan artigu tres maibe problema Ministra no nia Vise Ministru la ba iha dia oitu.”
Nia esplika katak, artigu ida to’o rua nebe mak komisaun A konsege dedate mak konaba dokumentus rai nian nebe mak iha tempu okupasaun Portugues to’o tempu Indonesia konaba aforamentu, dokumentus sira ne’e kontinua validu ka la validu ona.
Entretantu Deputadu Manuel Viegas Carascalao, PSD nudar membru komisaun A, hateten katak, Lei Rai nian Komisaun A diskuti ona iha espesialidade maibe artigu barak mak sidauk diskuti hotu.
“Ministra ho nia Vise Ministru mos la partisipa reuniaun iha Maubara ,maibe tama iha diskusaun orsamentu jeral do estadu mak paradu hela,” Deputadu Carrascalao hateten.
Deputadu ne’e haktuir tan katak depois remata diskusaun Orsamentu Jeral do Estadu mak foin bele komisaun A kontinua halo diskuti ba lei ne’e.
“Iha rejimentu parlamentu nian hateten kuandu orsamentu jeral du estadu tama ona iha parlamentu aktividade hotu hotu para hotu,” tenik Deputadu Carrascalao.
Nia hateten tan katak, Lei Rai nian tenki aprova lalais tanba dala barak ema hadau malu rai sai problema bot halo ema to’o oho malu .
“Lei ne’e tenki aprova lalais, se lae se mak hetan sofre ba bebeik, ita nia povu mak hetan sofre ba bebeik.”
Alende ne’e Deputada Virgina Ana Bela, CNRT, hateten katak, lei konaba ba rai parlamentu sidauk bok maibe agora komisaun A bok dadauk ne’e lei rejime especial atu regula ba okpusaun illegal sira.
“Agora prosesu ne’e lao hela komisaun A konsentra hela iha Maubara depois atu diskuti didiak atu nune’e ninia impaktu labele prejudika Povu sira,”dehan Deputada Ana Bela.
Deputada Ana Bela apela ba Komisaun A atu diskuti didiak ba lei ne’e hodi ases an husi interese privadu .
“Tanba agora dadauk membru parlamentu rasik, iha mebru Governu balun mos agora dadauk okupa hela rai estadu ninian, no mos rai ema seluk ninian,” Deputada Ana Bela dehan.
