“Hau iha partidu kuaze tinan sanulu hau prezidenti, entaun hau tenke fo fatin ba jerasaun foin sa’e sira,ita labele tur kadeira ita deit mak tur,”hatan Deputadu Carascaláo bainhira husu kona-ba nia aan atu kandidata aan iha eleisaun prezidensial 2012, semana kotuk (03/10)iha Uma Fukun.
Fundador Partidu PSD ne’e dehan ohin loron foinsa’e barak mak iha kapasidade hodi bele kandidata aan ba pozisaun Prezidente da Republika no bele dezenvolve nasaun ida ne’e.
“Hau lakohi tama iha situsaun hadau malu Kadeira ne’e la diak tanba tempu nebe ita brani ne’e mak tempu uluk bapa sira iha ne’e mak ita brani,agora demokrasia,”eis Vise Primeiru Ministru ne’e reforsa.
Nia hatutan,la’os tanba partidu PSD la sufsiente atu suporta nia ba kandidatura prezidente nian maibe sai president tenke ema ne’ebe independente,la’os husi partidu.
Eis governador tempu Indonezia ne’e hateten maske husi partidu mak husu atu nia kandidata aan maibe nia dehan “ne’e la’e,”.
Entretantu Deputada Maria Exposto husi bankada PSD hateten sira nia partidu rasik ate agora seidauk anunsia kandidatu ba Prezidente da Republika iha eleisaun jeral 2012 nian.
“Ami koko halo aprosimasaun maibe sempre mosu dehan ,hau sidauk bele,hau sidauk prontu maibe ami kontinua nafatin atu hamosu ami nia kandidatu proprio,” Deputada ne’e dehan.
Maske nune’e, nia dehan agora sira iha ona kandidatu tolu ne’ebe deside liu husi enkontru maibe seidauk bele publika ba publiku.
