Tuir Komandante Jeral Forsa Defeza Timor-leste (F-FDTL), Xefe Estadu Maior Jeneral Taur Matan Ruak katak atu hametin relasaun no unidade ho povu tenke ho haraik aan.
“Hametin ita nia relasaun ho ita nia povu tenki sai humilde, ba sira ne’ebe forte ita la hakruk ba sira ,ba sira ne’ebe kasian ita tenki haraik aan ba sira , ita fo liman ba sira , ajuda sira hodi foti sira hanesan mos ita,”hateten Xefe Estadu Maior Jeneral Taur Matan Ruak semana kotuk (29/09) iha serimonia despedida ho membru F-FDTL sira iha Metinaro,Dili.
Tuir nia, independensia ne’ebe ohin loron Timor hetan ne’e la’os ho kilat maibe lori vontade deit, hakarak no ho domiin hodi nakfilak frakeza ba forsa hodi manan no ohin loron hetan ukun aan.
Maske nune’e, atu hetan independensia ida ne’e iha soldadu rihun ba rihun mak lakon sira vida hodi husik hela sira nia familia durante okupasaun kolonializmu sira iha Timor.
“Husik hela faluk, oan kiak sira , balun liman tohar,ain tohar namkari iha rai Timor Loro Sa’e nia laran tomak, konkista ida ne’ebe liga historia Timor nian, liga historia povu Timor nian ne’ebe mehi atu sai nasaun independente, soberanu no livre iha mundu rai klaran,”nia katak.
Tanba ba sira ne’ebe sei moris,bele aproveita oportunidade ida ne’e ho didiak “Ami rekumpa imi nia formasaun,imi nia kbi’it,imi nia matenek,aumenta kbiit hodi servi diak liu, ba estuda iha rai liur. Iha ami nia tempu laiha oportunidade hanesan imi iha,ami nia tempu iha liafuan ida deit mak ba funu, aprende iha funu laran,”nia tenik.
Enkuantu Koronel Falur Rate Laek hateten iha mundu ne’e laiha ema ida mak manda to’o mate iha kualker pozisaun ida inklui iha instituisaun F-FDTL hanesan akontese dadaun ba Komandante Jeral Taur ne’ebe rezigna aan hodi fila-fali ba vida sivil.
“Nia labele sai aman ba bei-beik, tenke sai avo mak sai ba matebian ida,ida ne’e mak ita nia prosesu moris iha mundu ne’e hanesan siklu ida,”nia dehan.
Iha fatin hanesan tuir Komandante Operasional Militer,Renilde katak nia parte kontente tanba durante Taur nia lideransa iha buat barak mak nia aprende maske agora tenke husik instituisaun F-FDTL hodi vila ba vida sivil.
“Maske ami falta lider ida ne’ebe diak iha instituisaun ida ne’e maibe ami orgullu tanba durante iha ninia komanda ami hasai buat barak ho nia, ami nia soldadu no ami familia kontente tanba nia lideransa ne’ebe diak,”nia katak.
Tuir nia, maske todan atu husik maibe ida ne’e ninia direitu hodi halo fali servisu seluk ne’ebe nasaun no estadu presiza e “ita tenke respeitu,”.
