Relasiona ho atividade vizita Asembleia Parlamentar Komunidade Paizes ba Lingua Portugues (AP-CPLP) ne’ebé hala’o ho susesu, Membru Parlamentu Nasional fo parabens ba komponentes hotu no fo agradese ba polisia tranzitu ne’ebé halo kontrolu maka’as iha estrada.
“Ha’u hakarak kongratula ba komponentes hotu –hotu ne’ebé mak kontribui ba funsionamentu AP-CPLP durante semana ida nia laran iha Timor-leste, em partikular ha’u fo agradese ba polisia tranzitu ne’ebé sai mata dalan diak, ba protokolu Parlamentu nian no asesores husi asembleia da republika ne’ebé mak fo ona apoiu,” agradese Deputada Maria Fernanda Lay semana kotuk (27/09) iha plenaria PN.
Tuir nia,ho vizita no hala’o atividade AP-CPLP ne’e hatudu ba mundu ona katak Timor-leste mos iha kapasidade atu organiza eventu bo’ot hanesan foin dadauk ne’e.
“Populasaun em partikular merese ita nia agradesementu tanba komitiva AP-CPLP ba iha ne’ebé- ne’ebé de’it la iha problema , hotu-hotu fo nia apoiu to’o eventu ne’e remata,”nia dehan.
Alende Deputada Maria Fernanda Lay, Deputadu Adriano do Nascimento mos hato’o agradesementu ba Prezidente PN no Grupu Nasional Asembleia Parlamentar CPLP ne’ebé servisu maka’as durante vizita CPLP iha TL.
“Primeiru ha’u hakarak hato’o parabens ba Grupu Nasional ne’ebé mak organiza eventu internasional iha ita nia rai,“ Deputadu husi bankada PD ne’e fo agdradese.
Parabens mos ba Prezidente Parlament Nasional ne’ebé mak sai Prezidente Asembleia Parlamentar ba CPLP nian durante iha Timor.
“Ha’u hakarak fo parabens ba Prezidente Parlamentu ne’ebé fo ona nia konfiansa ba ekipa grupu nasional, ekipa tekniku para halo servisu ne’ebé diak iha konferensia ida ne’e halo Timor nia naran sai bo’ot teb-tebes, “nia fo parabens.
Nia mos la haluha fo agradese ba asesor nain rua husi Portugal ne’ebé fo sira nia apoiu tekniku maka’as durante eventu ne’e la’o.
