Atu fortifika liu tan sensibiliza programa igualidade jeneru, Governu liu husi Sekretaria Estadu Promosaun e Igualidade (SEPI) servisu hamutuk ho Universidade Nasional Timor Lorosa’e loke Sentru Estudus Jeneru (SEJ) iha universidade ne’e liu husi asina akordu hodi servisu hamutuk ba jeneru.
“Hau hanoin universidade hanesan ema ne’ebe akademiku, ema matenek husi ne’eba tanba ne’e mak importante tebes atu reforsa no fortifika diak liu tan atu oinsa bele sensibiliza programa igualidade jeneru ba iha programa sira ne’ebe sei hala’o iha UNTL,” hateten SE. Idelta Maria Rodrigues hafoin asina akordu ho UNTL, semana kotuk (23/09) iha Palasiu Governu, Dili.
Tuir nia, area hirak ne’ebe atu hala’o no identifika, atu halo peskiza parseria hamutuk liu-liu atu dezenvolve konesementu ba iha area jeneru nian, tuir maim aka oinsa atu bele harii mos sentru estudus jeneru iha UNTL.
Nia hatutan, iha formasaun balun ne’ebe importante sei hala’o iha universidade nia laran, nune’e iha future labele hein deit peritu sira husi estranjeiru maibe tenke hasai duni husi universidade laran.
Entretantu tuir Reitor UNTL, Aurelio Guterres katak oras ne’e dadaun dosente lubuk ida ba hasai ona kursu iha area jeneru nian tanba iha future parseiria husi Espanha liu husi AECID sei loke mos programa jeneru nian iha universidade.
Nia hatutan, koperasaun hamutuk hanesan atividade no reforsa ho instituisaun hotu-hotu iha rejional no mos internasional, univeristariu, governu inklui ajensia internasional.
“Ita nia koperasaun importante no hanesan pasu foun ida atu hetan rezultadu ne’ebe bele fo valorize ba instituisaun tomak,” Reitor Aurelio katak.
