Relasiona ho lei reparasaun ba vitima 1975 to’o 1999 ne’ebe to’o agora sei pendente hela husu ba Parlamentu Nasional atu aprova lalais lei ne’e nune’e bele responde vitima sira nia terus ba luta independensia durante 24 anos.
Tuir Diretor Komisaun Verdade e Amizade (CVA) Agostinho de Vasconçelho, katak lei reparasaun ne’e importante ba vitiima sira tanba bazea ba lei ne’e bele tau matan ba sira.
“Ita bo’ot sira bele husu ba iha ita nia Prezidente, Primeiru Ministru no mos ba Prezidente Parlamentu katak bainhira mak sir abele responde CAVR nia rekomendasaun,”hateten Diretor CAVR/CVA, Agostinho Vasconçelho semana kotuk (20/09) hafoin simu vizita delegasaun husu Asembleia Parlamentar CPLP iha sira nia fatin Balide, Dili.
Nia hatutan, alende lei reparasaun, CAVR/CVA mos aprezenta Lei Instituisaun Kontinuasaun misaun CAVR nian mos PN seidauk aprova.
Entertantu Deputadu Manuel Tilman hateten, lei reparasaun ba vitima 1975 no 1999 horas ne’e dadauk iha ona parlamentu tama ona iha diskusaun espesialidade.
“Tanba sa mak lei reparasaun ba vitima sira sei suspensu hela tanba problema veteranus sira nian duni tanba komisaun de revizaun lista veteranus sira nian mak seidauk loos,”Tilman dehan.
Tuir Prezidente Partidu KOTA ne’e katak, reparasaun ne’ebe fo ba vitima sira ne’e lahanesan ho veteranus sira nian.
“Sira seluk hanesanUDT sira, APODETI sira mate depois tanba mate sira nia ideolojia ho ema balun tulun rezistensia no mos tulun Fretilin maibe mate tanba rai Timor ,sira ne’e mak atu hetan rekonesementu ne’e la’os indeminizasaun ho hanesan veteranu nian ne’e,” Tilman esplika.
Prezidente Komisaun C Parlamentar ne’e hatutan, lei reparasaun ne’e karik tinan ne’e la konsege aprova ona tanba tempu limitadu ona.
“Ami agora hein hela orsamentu jeral du estadu 2012 nian iha loron 30 setembru tama mai ,entaun ami la halo tan buat seluk ona,”nia katak.
“Signifika katak hein lejislatura foun halo fali lei foun no mos proposta foun, se sira hakarak aprova lei ne’e iha lejislatura ida ne’e tenke aprova antes de eleisaun jeral ba Parlamentu Nasional,“ nia dehan.
