Sentru Rekursu Feto Fundasaun Alola (CRF-FA) prontu atu ajuda no kapasita feto sira liu-liu feto potensial sira atu oinsa mak sira bele hasa’e sira nia kapasidade.
“Iha ne’e ami iha mini biblioteka sir abele asesu iha ne’e,liu-liu estudante feto iha universidade ne’ebe presiza livrus referensia, ami mos iha komputador atu sir abele uza ba halo sira nia tugas, ba sira ne’ebe lahatene komputador ami hanorin sira mas baziku deit,”hateten Manajer CRF-FA, Alzira Sequera Viera semana kotuk (22/09) iha Delta Nova, Dili.
Alende fo kapasitasaun kona-ba komputador, CRF mos atende vitima Violensia domestika ne’ebe mai hato’o keixa,liu-liu ba feto sira.
“Ami fo akonsolamentu baziku ba vitima sira ne’e, maibe atividade espesifiku liu mak ami iha diskusaun mensal ho grupu feto sira inklui mos mane iha area lideransa nian,iha area saude no seluk tan,”nia katak.
Tuir nian, laos ida ne’e deit maibe sira mos fornese formasaun abilidade moris ba estudante sira ne’ebe la remata sira nia estudu husi distritu 13 atu fornese formasaun ba joventude sira ne’e hotu.
“Oinsa mak sira bele konese diak liu tan kona-ba sira nia a’an , oinsa sira atu foti desizaun ba sira nia aan no mos koalia kona-ba saude reproduktiva, saude sexual no fo mos konesementu kona-ba oinsa foti desizaun,” nia hatutan.
Alende ne’e fo mos advokasia lei sira ne’ebe bele garantia feto no labarik sira nia direitu hanesan halo advokasia kona-ba Konvensaun Eliminasaun ba Diskriminasaun hotu ne’ebe Kontra Feto (CEDAW), Konvensaun Direitu Labarik nian inklui mos Lei Violensia Domestika nian.
Iha parte seluk Jacinta da Cruz, Liaison Officer iha Fundasaun Alola, katak durante ne’e nia parte simu keixa barak husi vitiima sira maibe barak mak dada fali sira nia kazu.
“Sim, iha maluk feto balu ne’ebe sai vitima ba violensia domestika mai hato’o tiha keixa, ita hato’o tiha ba iha tribunal maibe sira balu husu atu resolve deit iha uma ka tuir familia deit,” nia katak.
