Fundasaun Mahein (FM) iha nia relatoriu fo sai katak Polisia Maritima (PM) deskobre trafiku kilat illegal no 7 pursentu hosi hirak ne’e kila anin.
“Kilat hirak ne’e sira deskobre la’os kilat bo’ot maibe kilat manu nian mas ami diskunfia katak husi movement illegal neebe mak barak liu iha indikasaun katak iha mos kilta sira seluk,” hateten Peskizador FM, Joao Almeida semana kotuk (21/09) iha konfrensia da imprensa iha Balide,Dili.
Tuir nia atu identifika kilat illegal iha ka laiha, presiza halo peskiza no halo investigasaun ne’ebe klean nune’e bele hatene tuir.
“Provizoriumente iha ami nia relatoriu ida ne’e foin identifika pursentu 7 kilat illegal, kilat manu nian,” Almeida dehan.
Entertantu tuir Diretor Ezekutivu FM Nelson Belo katak kona-ba kilat illegal ne’e, oras ne’e dadauk ema barak mak kestiona katak kilat sira ne’e halo tarutu arbiru deit iha komunidade sira nia le’et.
“Ema barak kestiona dehan kilat ne’e kaer iha Baucau, balun tarutu iha Dili laran no mos fatin seluk maibe seidauk iha instituisaun formal Governu nian ida mak halo esplikasaun formal ba komunidade sira,” nia preokupa.
Nia hatutan, ho kilat illegal hirak ne’e no halo tarutu arbiru halo komunidade sira sai paniku tanba ne’e governu presiza esplika klaru ba iha komunidade kona-ba ejistensia kilat hirak ne’e.
Alende ne’e Nelson mos kestiona kona-ba munisoens container 2 ne’ebe hatama illegal husi misaun ONU nian iha Timor-leste (UNMIT) ne’ebe seidauk esplika klaru ba publiku.
“Ami hanoin buat sira ne’e mak halo povu sira paniku e governu tenke esplika ba povu, tanba eleisaun mos besik ona,” nia sujere.
