Iha Timor-Leste pursentajen aas feto hetan violensian domestika maske Konvensaun Hasoru Diskriminasaun Kontra Feto (CEDAW) ratifika ona no mos iha ona Lei Kontra Violensia Domestika, tuir Prezidente Feto Parlamentar, Josefa Pereira, iha Parlamento Nasional iha Dili.
“Atu hamenus violensia domestika, ami iha Parlamentu ratifika ona Konvensaun Diskriminasaun Kontra Feto, Lei kontra Violensia Domestika, lei eleitoral hodi fo importansia ba feto atu partisipa iha eleisaun no agora dadaun ami mos halo hela lei igualidade atu fo espesifikasaun ba direitu sira ne’e,” hateten Deputada no Presidente Feto Parlamentar Pereira, iha PN, Dili, semana kotuk.
Maske numeru kazus feto hasoru violensia iha kontestu uma laran sei aas nafatin iha railaran, hosi Sekretaria de Estadu ba Promosaun Igualdade (SEPI), halo ona abordajem integrado kona ba promosaun igualdade Jeneru iha Ministerius no hamutuk ho autoridades lokal sira atu bele sosializa mos komunidade atu hatene liu kona ba prevensaun violensia hasoru feto no mos katak Violensia Domestika nudar krimi publiku ida tuir Lei Violensia Domestika ne’ebe vigora.
Tuir Xefe Gabinete, SEPI, Maria Filomena “durante ne’e ami halo sosializasaun ho ema hotu husi nivel aas to’o ba baze hanesan autor Juridiku sira no Lideransa Komunitaria sira mak besik liu komunidade.”
Nia hatutan tan katak liu husi inisiativa sosializasaun hirak ne’e wainhira ema halo violensia kontra feto iha komunidade nia le’et lideransa komunitara no juventude sira bele ona referensia ida kona ba saida mak sira bele halo rasik atu nune la bele akontese tan.
Iha parte seluk Diretor Nasional Sidadaun Timor-Leste (DNCTL), Celito Cardoso, hateten Ministeriu Justisa la kaer direitamente kazu Violensi Domestika maibe fo suporta ba instituisaun kompentente hodi halo investigasaun ba kazu violensia domestika wanhira keixa ruma mosu.
“Ami [Ministeriu Justisa] sai hanesan fatin administrativu ba instituisaun sira hanesan Tribunal, Prokuradoria, Ministeriu Publiku mak atende kazu Violensia Domestika.’ Nia haktuir katak Ministeriu Justisa mos halo disseminasaun informasaun ba sosiedade kona-ba Violensia Domestika teritoriu tomak.
Komunidade Januario Beci hanoin katak violensia domestika mosu dalruma tanba dezentendementu entre feto ho mane iha kontestu familia laran.
“Iha situasaun real feto sira dala ruma depende liu ba mane. Maibe kazu ruma ne’ebe grave liu tenke tuir dalan legal hodi hetan pena tuir lei ne’ebe vigora iha Timor Leste.”
Nia haktui katak atu labele akontese violensia iha familia laran presiza kolaborasaun no aproximasaun ne’ebe diak entre feto no mane nune’e bele rezolve problema ho diak iha familia laran.
