Maske kazu violensia domestika kontinua buras iha rai laran maibe tuir Xefe Ezekutivu Fundasaun Alola (CEO FA) Tereza Verdial de Araujo, katak komunidade komesa iha ona komprensaun kona-ba Lei Violensia Domestika (VD) nian.
“Tanba sa hau dehan nune’e, uluk antes iha lei ne’e laiha ema ida mak mai halo keixa maibe depois de iha lei,ema liu-liu vitima sira halo keixa bar-barak bainhira hetan violensia iha uma laran husi sira nia la’en, entaun sira komesa ona komprende katak violensia ne’e krimi,”hateten CEO Tereza Verdial semana kotuk (26/8) iha Mascarenhas,Dili.
Maske nune’e nia parte mos rekonese katak keixa hirak ne’e seidauk hetan finalidade iha tribunal tanba barak mak sei pendente hela iha tribunal.
“E ida ne’e signifika katak vitima feto sira ne’ebe durante ne’e hela iha uma mahon FOKUPERS nian tenke hela kleur tan to’o sira nia kazu hetan finalidade iha tribunal,”nia dehan.
Entretantu tuir Prezidente Board FA, Kirsty Sword Gusmao, katak atu redus numeru viollensia domestika liu husi sosializasaun ba iha komunidade sira.
“Durante ne’e fundasaun halo ona sosializasaun bar-barak ba iha komunidade sira kona-ba lei ne’e nune’e sira iha komprensaun no bele hamenus violensia kontra feto iha uma laran,”nia katak.
Iha fatin hanesan Jacinta da Cruz, Liaison Officer iha FA hateten durante ne’e nia parte simu keixa barak husi vitima VD sira maibe barak mak husu atu resolve deit iha familia.
“Sim, iha feto maluk balu ne’ebe sai vitima ba violensia domestika mai hato’o tiha keixa,ita hato’o tiha ba iha tribunal maibe sira balu husu atu resolve deit iha uma tuir familia nian,”nia dehan.
